जि.प.प्रशासक संजयसिंह चव्हाण यांचे आवाहन : 15 ऑगस्टपर्यंत अर्ज करण्याची मुदत : शेळी गट आणि कडबाकुट्टीसाठी मिळणार अनुदान
प्रतिनिधी/कोल्हापूर
जिल्हा परिषदेच्या पशुसंवर्धन विभागाच्या माध्यमातून सेस फंडातून विविध योजना राबविण्यात येत आहेत. या योजनांचा लाभ घेवून पशुपालकांनी आर्थिक उन्नती साधावी, असे आवाहन जिल्हा परिषदेचे प्रशासक तथा मुख्य कार्यकारी अधिकारी संजयसिंह चव्हाण यांनी केले . या योजनेसाठी 15 ऑगष्ट पर्यंत अर्ज करण्याची मुदत आहे.
जिल्हा परिषद पशुसंवर्धन विभागाकडून जिल्हा परिषद सेसफंडामधून 75 टक्के अनुदानावर शेळी गट वाटप योजना राबविण्यात येत आहे. या योजनेमध्ये 2 शेळीचे युनिट विधवा, परितक्त्या आणि दारिद्र रेषेखालील महिला व निराधार महिलांना दिले जाणार आहे. सदर योजनेसाठी 12,400 रूपये एवढी अनुदान मर्यादा निश्चित केली आहे. तसेच जिल्हा परिषद सेसफंडामधून अनुदानावर कडबाकुट्टी म्शािनचा पुरवठा करण्यात येणार आहे. लाभार्थींनी विहित मापदंडाच्या कडबाकुट्टी मशीन खुल्या बाजारातून खरेदी केल्यानंतर थेट लाभ हस्तांतरण पध्दतीने 50 टक्के अनुदानाची रक्कम लाभार्थ्यांच्या बँक खात्यावर वर्ग करण्यात येईल असे संजयसिंह चव्हाण यांनी सांगितले. सदर योजनांचे अर्ज पंचायत समिती स्तरावर उपलब्ध असून लाभार्थ्यांचे परिपूर्ण प्रस्ताव 19 जुलै 2022 ते 15 ऑगस्ट 22 या कालावधीत पंचायत समिती स्तरावर स्विकारण्यात येणार आहेत . तरी पात्र व गरजू लाभार्थ्यांनी लाभ घ्यावा. तसेच अधिक माहितीसाठी पशुसंवर्धन विभाग, पंचायत समिती येथे संपर्क साधावा, असे आवाहन जिल्हा परिषदेच्या पशुसंवर्धन विभागामार्फत केले आहे.
