पुणे / प्रतिनिधी :
पुणे शहरातील विविध भागात दिवसा घरफोडी करणाऱ्या टोळीला विश्रांतवाडी पोलिसांनी अटक केली आहे. यामध्ये एका सराफाचादेखील समावेश असून, त्यांच्या ताब्यातून सात लाख 48 हजार रुपयांचा मुद्देमाल जप्त करण्यात आला असून एकूण आठ घरफोडीचे गुन्हे पोलिसांनी उघड केले असल्याची माहिती पोलिसांकडून देण्यात आली.
पंचाक्षरी संगय्या स्वामी (वय 35), शावरसिद्ध भरत पुजारी (वय 35), नरेश विष्णू अच्चूगटला (वय 33), अंगद वाल्मिक मंडगर (वय 30), कल्याणप्पा मलप्पा इंडी (वय 49, रा. सर्व जण सोलापूर) अशी अटक करण्यात आलेल्या आरोपींची नावे आहेत. सदर टोळी पुणे शहरात दिवसा बंद असलेली घरे शोधून घरफोडय़ा करत होती. नोकरी अथवा कामाच्या निमित्ताने बाहेर गेलेल्या नागरिकांच्या घराची रेकी करून चोरटे त्यांचा डाव साधत होते.
विश्रांतवाडी परिसरातील घरफोडीच्या गुन्ह्यातील आरोपींचा शोध घेत असताना तांत्रिक विश्लेषण आणि खबऱ्यांमार्फत पोलीस कर्मचारी संपत भोसले व प्रफुल्ल मोरे यांना माहिती मिळाली, की मुंजाबावस्ती येथे तीन व्यक्ती संशयितरीत्या थांबले असून, ते घरफोडीच्या तयारीत आहेत. त्यानुसार विश्रांतवाडी पोलिसांनी दोन पथके तयार केली व या तीन आरोपींना पकडण्याचा प्रयत्न केला. मात्र, पोलिस आल्याची चाहूल लागताच आरोपींनी पळ काढला. मात्र, पोलिसांनी प्रसंगावधान राखत तिघांच्याही मुसक्या आवळल्या.
संबंधित आरोपींच्या चौकशीत तिघांनी विविध ठिकाणी घरफोडय़ा केल्याचे निष्पन्न झाले आहे. तसेच त्यांच्या ताब्यातून कटावणी व इतर साहित्य जप्त करण्यात आले. ही कामगिरी अपर पोलिस आयुक्त रंजन कुमार शर्मा, उपायुक्त श्रीकांत बोराटे, सहायक पोलिस आयुक्त आरती बनसोडे, वरिष्ठ पोलिस निरीक्षक दत्तात्रय भापकर, भालचंद्र ढवळे यांच्या मार्गदर्शनाखाली पोलिस उपनिरीक्षक लहू सातपुते, पोलीस हवालदार दीपक चव्हाण, यशंवत कर्वे, कर्मचारी संपत भोसले, प्रफुल्ल मोरे, संदिप देवकाते, शेखर खराडे यांच्या पथकाने केली.
मेसचालक पुजारीच दागिन्यांची विल्हेवाट लावायचा
शावरसिद्ध पुजारी हादेखील मूळचा सोलापूर येथील आहे. तो पुण्यातील कर्वेनगर येथे मेस चालवतो. चोरी, घरफोडी करण्यासाठी टोळी पुण्यात आल्यानंतर त्यांची सर्व व्यवस्था तो करत असे. घरफोडीत मिळालेले दागिने संबंधित तिघे पुजारीकडे ठेवत असत, पुढे पुजारी ते दागिने सोलापूर येथील सराफ कल्याणप्पा इंडी याच्याकडे देत होते.
स्वामी टोळीप्रमुख, घरफोडीचे 70 ते 80 गुन्हे
पंचाक्षरी स्वामी हा घरफोडीतील सराईत गुन्हेगार आहे. तोच टोळीप्रमुख असून, त्याच्यावर तब्बल 70 ते 80 घरफोडीचे गुन्हे दाखल आहेत. नरेश याच्यावरदेखील 20 ते 22 गुन्हे दाखल आहेत. तर बंडगर याच्यावर मुंबई येथे आठ गुन्हे दाखल आहेत. तिघेही सराईत घरफोडे असल्याचे पोलिसांनी सांगितले.
