विशेष विद्यार्थ्यांच्या स्पर्धेत नुने विद्यालयाचे सुयश

पणजी : गोवा समग्र शिक्षा अभियानातर्फे 2022-23 सालासाठी दिव्यांग विद्यार्थ्यांसाठी ‘टाकाऊतून टिकाऊ’ या बुद्धिमत्ता चाचणी स्पर्धेचे आयोजन करण्यात आले. दिपावली व ख्रिसमस या विषयांवर हस्तकला स्पर्धा झाली. यात स. प्रा. वि. नुने सांगे विद्यालयाचा विद्यार्थी अंकुर अरविंद गावकर याने पोफळीची पोवली व नारळाच्या काथ्याचा वापर करून ‘ख्रिसमस’ विषयावर प्रतिकृती तयार केली. या स्पर्धेत त्याला तालुका व राज्यपातळीवर द्वितीय पारितोषिक मिळाले. मागील दोन वर्षात या स्पर्धेत तालुका पातळीवरून तो प्रथम क्रमांकाचा मानकरी ठरला होता. अंकुरची निरीक्षण शक्ती दांडगी असून विद्यालयाच्या सर्व उपक्रमात त्याचा यथाशक्ती सक्रीय सहभाग असतो. त्याला विद्यालयाचे मुख्याध्यापक प्रकाश फडके, पालक अरविंद गावकर यांचे मार्गदर्शन तथा प्रोत्साहन लाभले. सांगे तालुका भागशिक्षणाधिकारी सीताराम नाईक गोवा समग्र शिक्षा अभियान सांगेच्या मारिया जे. एल. डिमेलो फर्नांडिस यांनी अंकुरचे कौतुक तथा अभिनंदन केले आहे.