वृत्तसंस्था/ बेंगळूर
2022 रणजी क्रिकेट स्पर्धेतील येथे सुरू असलेल्या उपांत्यपूर्व फेरीच्या सामन्यात उत्तराखंडविरूद्ध मुंबईने 647 धावांचा डोंगर रचला. मुंबई संघातील सुवेद पारकरने द्विशतक (252) तर सर्फराज खानने शतक (153) झळकविले. या जोडीने चौथ्या गडय़ासाठी 276 धावांची भागिदारी केली. खेळाच्या दुसऱया दिवसाअखेर उत्तराखंडने पहिल्या डावात 2 बाद 39 धावा जमविल्या होत्या.
मुंबई संघाने 3 बाद 304 या धावसंख्येवरून खेळाला पुढे सुरूवात केली. 104 धावांवर नाबाद राहिलेल्या सुवेद पारकरने द्विशतक झळकविताना 447 चेंडूत 4 षटकार आणि 21 चौकारांसह 252 धावा झळकविल्या. 69 धावांवर खेळणाऱया सर्फराज खानने 205 चेंडूत 4 षटकार आणि 14 चौकारांसह 153 धावा झळकविल्या. सर्फराज खान चौथ्या गडय़ाच्या रूपात बाद झाला. नंतर मुलानीने 82 चेंडूत 3 षटकार आणि 10 चौकारांसह 59, कोटीयनने 1 षटकार आणि 1 चौकारांसह 28, तुषार देशपांडेने 1 षटकार आणि एक चौकारांसह नाबाद 20 धावा जमविल्या. सुवेद पारकर धावचीत झाल्यानंतर मुंबईने आपला पहिला डाव 166.4 षटकांत 8 बाद 647 धावांवर घोषित केला. उत्तराखंडतर्फे दीपक धपोलाने 3 गडी तर तिवारी, स्वप्नील सिंग, मिश्रा व कमल सिंग यांनी प्रत्येकी एक गडी बाद केला.
प्रथमश्रेणी क्रिकेटमध्ये पदार्पण करताना पारकरने द्विशतक झळकविले. पदापर्णात प्रथमश्रेणी क्रिकेटमध्ये सर्वाधिक धावा जमविणाऱया फलंदाजांमध्ये पारकर चौथ्या स्थानावर आहे. सर्फराज खानने प्रथमश्रेणी क्रिकेटमधील आपले सातवे शतक झळकविले.
मंगळवारी खेळाच्या दुसऱया दिवशी उत्तराखंडने पहिल्या डावात 11 षटकांत 2 बाद 39 धावा जमविल्या. कर्णधार जय बिस्त देशपांडेच्या गोलंदाजीवर खाते उघडण्यापूर्वी झेलबाद झाला. मयांक मिश्राला अवस्थीने 4 धावांवर झेलबाद केले. कमल सिंग 27 तर चंदेला 8 धावांवर खेळत आहेत. मुंबईतर्फे देशपांडे आणि अवस्थी यांनी प्रत्येकी एक गडी बाद केला.
संक्षिप्त धावफलक
मुंबई प. डाव 166.4 षटकांत 8 बाद 647 डाव घोषित (सुवेद पारकर 252, सर्फराज खान 153, अरमान जाफर 60, मुलानी 59, जैस्वाल 35, शॉ 21, कोटीयन 28, देशपांडे नाबाद 20, धपोला 3-89, तिवारी, स्वप्नील सिंग, मिश्रा, कमल सिंग प्रत्येकी एक बळी), उत्तराखंड प. डाव.-11 षटकांत 2 बाद 39 (कमल सिंग खेळत आहे 27, चंदेला खेळत आहे. 8, बिस्त 0, मिश्रा 4, देशपांडे, अवस्थी प्रत्येकी एक बळी).
