निलंबित पोलीस कर्मचारी घाटगेच्या मुसक्या आवळल्या

कोल्हापूर : 

दवाखान्याच्या अतिदक्षता विभागात उपचार घेत असलेल्या अल्पवयीन मुलीचा जबाब घेण्यासाठी गेल्यानंतर तिचा विनयभंग करुन पसार असलेल्या पोलीस कर्मचाऱ्याच्या मुसक्या आवळण्यात पोलिसांना यश आले. गुरुवार (4 एप्रिल) रोजी गुन्हा दाखल होताच चेतन दिलीप घाटगे हा पसार झाला होता. गेल्या 4 दिवसांपासून पोलीस त्याचा शोध घेत होते. अखेर मंगळवारी पहाटे केटवडे (आजरा) येथे एका गोठ्यात लपून बसलेल्या चेतनला अटक करण्यात आली. मंगळवारी सकाळी त्याला न्यायालयात हजर केले असता, न्यायालयाने त्याला एक दिवसांची पोलीस कोठडी सुनावली.

याबाबत अधिक माहिती अशी की, एका अल्पवयीन तरुणीने हात कापून घेतल्याची घटना बुधवारी घडली होती. त्या तरुणीचा जबाब घेण्यासाठी शाहूपुरी पोलीस ठाण्यातील पोलीस नाईक पदावर कार्यरत असणारे चेतन घाटगे रात्री 8 वाजण्याच्या सुमारास दवाखान्याच्या अतिदक्षता विभागात गेले होते. जबाब घेत असताना घाटगे यांनी त्या तरुणीस स्वत:चा वैयक्तीक मोबाईल नंबर देत, तु माझी मैत्रीण आहेस घाबरु नकोस, काही अडचण असल्यास मला फोन कर असे सांगत तिची छेड काढली. तसेच तिच्या अंगाला स्पर्श करत लज्जा उत्पन्न होईल असे वर्तन करुन त्या तरुणीचा विनयभंग केला. या प्रकरणी गुरुवारी (4 एप्रिल) रोजी रात्री उशिरा चेतन घाटगेवर शाहूपुरी पोलीस ठाण्यात भारतीय न्याय संहिता कलाम 75 (1 ), 1, लैंगिक अपराधापासून बालकांचे संरक्षण अधिनियम 2012 चे कलाम 8, 10, 12 प्रमाणे गुन्हा दाखल करण्यात आला आहे होता. गुरुवारी दिवसभर चेतन घाटगे शाहूपुरी पोलीस ठाण्यात हजर होता. गुन्हा दाखल होण्याची कुणकुण लागताच घाटगेने पोलीस ठाण्यातून पलायन केले होते. गेल्या चार दिवसांपासून चेतन घाटगे याचा शोध घेण्याचे काम सुरु होते. स्थानिक गुन्हे अन्वेषण तसेच शाहूपुरी पोलीस ठाण्याचे गुन्हे शोध पथक चेतनच्या मागावर होते. चेतन घाटगेचा मोबाईल बंद असल्यामुळे त्याचा शोध घेण्याचे आवाहन पोलिसांसमोर होते. चेतन घाटगे यापूर्वी आजरा पोलीस ठाण्यामध्ये कर्तव्यास होता. त्यामुळे तो त्या ठिकाणीच लपला असावा असा अंदाज पोलिसांनी व्यक्त केला. यादृष्टीने तपास करुन मंगळवारी पहाटे त्याला अटक करण्यात आली.

• चेतन घाटगेचे दुसऱ्यांदा निलंबन

पोलीस कॉन्स्टेबल चेतन घाटगे याचे दुसऱ्यांदा निलंबन करण्यात आले आहे. यापूर्वी राजारामपुरी पोलीस ठाण्यामध्ये चेतन घाटगे याच्यावर विनयभंगाचा गुन्हा दाखल झाला होता. यावेळीही चेतनचे निलंबन करण्यात आले होते. मात्र या गुह्यातून चेतनची निर्दोष मुक्तता झाल्यानंतर त्याला पुन्हा सेवेत रुजु करुन घेण्यात आले होते. दरम्यान गुरुवारी गुन्हा दाखल झाल्यानंतर शुक्रवारी पुन्हा चेतन घाटगेचे निलंबन करण्यात आले.

• शेतातील गोठ्यात होता लपून

विनयभंगाचा गुन्हा दाखल झाल्यापासून चेतन घाटगे पसार झाला होता. तो थेट आजऱ्याकडे रवाना झाला होता. मंगळवारी सकाळी पोलिसांनी त्याच्याजवळून मोबाईल जप्त केला आहे. चार दिवसांपासून चेतन केटवडे येथील एका शेतकऱ्याच्या गोठ्यात लपून होता. स्थानिक गुन्हे अन्वेषणचे पोलीस निरीक्षक रविंद्र कळमकर, पोलीस निरीक्षक संतोष डोके यांच्या मार्गदर्शनाखाली तीन पथके चेतनच्या मागावर होती. एक पथक पन्हाळा परिसरात, दुसरे आजरा येथे तर तिसरे त्याच्या घरावर लक्ष ठेवून होते.

• नोकरीच्या ठिकाणीच अटक

चेतन घाटगे गेल्या दोन वर्षापासून शाहूपुरी पोलीस ठाण्यात कार्यरत होता. त्याचा बक्कल नंबर 420 आहे. मंगळवारी पहाटे अटक केल्यानंतर चेतन घाटगे याचे मेडीकल चेकअप करुन त्याला पोलीस ठाण्यात नेण्यात आले. यानंतर न्यायालयात हजर करत असताना त्याच्या हातमध्ये बेड्या घालण्यात आल्या होत्या. नोकरीच्या ठिकाणीच अटक होण्याची नामुष्की चेतन घाटगेवर आली.