सुरेश वालीशेट्टी यांचा एसकेई सोसायटीतर्फे सत्कार

बेळगाव : मुंबई पोलीस दलातील राष्ट्रवादी पदक विजेते निवृत्त असिस्टंट कमिशनर सुरेश वालीशेट्टी यांचा एसकेई सोसायटीचे चेअरमन किरण ठाकुर यांच्या हस्ते सत्कार करण्यात आला. 1993 साली झालेल्या मुंबई बॉम्बस्फोटाचे मुख्य तपास अधिकारी म्हणून सुरेश वालीशेट्टी यांनी काम केले आहे. त्यांनी केलेल्या तपासकार्याची दखल घेऊन त्यांना राष्ट्रपतीपदक देऊन गौरविण्यात आले. त्यांच्या कारकीर्दीत त्यांनी अनेक कुविख्यात गुंड, अंडरवर्ल्ड यांच्याशी संबंधित व्यक्तींचा तपास करून कारागृहाचा रस्ता दाखविला आहे. कर्तव्यदक्ष अधिकारी म्हणून त्यांची ओळख होती. मूळचे खानापूरचे असणारे वालीशेट्टी नवीन पिढीसाठी आदर्श असल्याचे गौरवोद्गार किरण ठाकुर यांनी काढले. याप्रसंगी डॉ. दामोदर वागळे, जीएसएस कॉलेजचे प्राचार्य बी. एल. मजुकर, प्रा. डॉ. एस. एम. देशपांडे, प्रा. वाय. बी. दळवी यासह इतर मान्यवर उपस्थित होते.