सूरज शंकर यांची एअर कमोडोरपदी नियुक्ती

बेळगाव : बेळगाव एअरमन ट्रेनिंग स्कूलचे एअर कमोडोर म्हणून सूरज शंकर यांची नियुक्ती झाली आहे. 31 जुलै रोजी एस. श्रीधर यांच्याकडून त्यांनी पदाची सूत्रे स्वीकारली. सूरज शंकर यांनी 1996 मध्ये भारतीय हवाई दलात (आयएएफ) प्रवेश घेतला. वेलिंग्टन येथील डिफेन्स सर्व्हिस स्टाफ कॉलेज (डीएसएससी) व सिकंदराबाद येथील कॉलेज ऑफ एअर  वॉरफेयर (सीएडब्ल्यू) येथे त्यांचे शिक्षण झाले. एक प्रशिक्षित फ्लाईंग इन्स्ट्रक्टर व हेलिकॉप्टर कॉम्बॅक्ट लिडर अशी त्यांची ओळख आहे. आपल्या कारकिर्दीत त्यांनी अनेक मोहिमा यशस्वी केल्या. याशिवाय हवाई दल प्रशिक्षक, महत्त्वाच्या फ्लाईंग बेसचे मुख्य ऑपरेशन अधिकारी, ‘कॉ’मधील डायरेक्टींग स्टाफ व ईशान्य क्षेत्रातील फ्रंटलाईन हेलिकॉप्टर युनिटचे कमांडिंग ऑफिसर म्हणून त्यांनी सेवा बजावली. आयएएफच्या एअर ऑफिसर-2004 मध्ये युएन पीस किपिंग फोर्सेसचा एक भाग म्हणून कांगो येथे कार्यरत असलेल्या भारतीय विमानचालन दलातही त्यांचा सहभाग होता. बेळगाव ट्रेनिंग स्कूलची सूत्रे स्वीकारण्यापूर्वी नवी दिल्ली येथील हवाई मुख्यालयामध्ये सेवा बजावली. हवाई दलामध्ये त्यांनी लक्षणीय कामगिरी केल्याबद्दल तसेच नेपाळमधील भूकंप मदतकार्यातील त्यांचे कार्य व ऑपरेशन मैत्रीदरम्यान त्यांनी केलेले प्रयत्न याबद्दल राष्ट्रपतींच्या हस्ते त्यांना वायुसेना पदकाने सन्मानित करण्यात आले आहे.