आमदार अपात्रता प्रकरणी आज सर्वोच्च सुनावणी

पणजी : काँग्रेसचे माजी प्रदेशाध्यक्ष गिरीश चोडणकर यांनी काँग्रेस आमदारांच्या अपात्रतेसंबंधी दाखल केलेल्या दोन याचिकांची एकत्र सुनावणी आज मंगळवार 19 ऑगस्ट रोजी सर्वोच्च न्यायालयाच्या न्यायमूर्ती सूर्यकांत आणि न्यायमूर्ती विक्रम नाथ यांच्या खंडपीठासमोर होणार आहे. सप्टेंबर 2022 मध्ये काँग्रेसचे दिगंबर कामत, आलेक्स सिक्वेरा, संकल्प आमोणकर, ऊडॉल्फ फर्नांडिस, मायकल लोबो, डिलायला लोबो, केदार नाईक आणि राजेश फळदेसाई या आठ आमदारांनी काँग्रेसमधून वेगळा गट स्थापन करून भाजपमध्ये प्रवेश केला होता. चोडणकर यांनी गोवा विधानसभा सभापतींच्या आदेशाला सर्वोच्च न्यायालयात विशेष याचिकेद्वारे आव्हान दिले आहे. 7 मार्च रोजी या विशेष याचिकेवर प्राथमिक सुनावणी झाली होती. त्यावेळी न्यायालयाने सभापतींसह आठ आमदारांना उत्तर दाखल करण्यासाठी नोटिसा बजावल्या होत्या. पुढील तात्पुरत्या सुनावणीची तारीख 29 एप्रिल देण्यात आली होती. त्या सुनावणीत कोणताही निर्णय न लागल्याने 22 जुलै ही पुढील तारीख ठरविण्यात आली होती. मात्र, त्या दिवशी देखील निष्कर्ष न लागल्याने आता सुनावणी 19 ऑगस्टला होणार आहे.