मजगाव-अनगोळ परिसरात प्रभावती मास्तमर्डींना पाठिंबा

बेळगाव : दक्षिण मतदार संघातील काँग्रेसच्या अधिकृत उमेदवार प्रभावती मास्तमर्डी यांचे मजगाव, मजगाव परिसर, अनगोळ परिसरात भव्य स्वागत करण्यात आले. नागरिकांशी संवाद साधून काँग्रेसने केलेल्या कामाची माहिती त्यांनी दिली. सर्वसामान्यांच्या हितासाठी काँग्रेस पक्ष कटिबद्ध आहे. त्यामुळे काँग्रेस पक्षाला मतदान करून निवडून देण्याची विनंती प्रभावती मास्तमर्डी यांनी केली. मजगाव येथे प्रचार कार्यक्रमात सहभागी होऊन नागरिकांशी चर्चा करताना प्रभावती मास्तमर्डी म्हणाल्या, मजगाव व अनगोळ परिसरातील नागरिकांचे माझ्यावरील प्रेम पाहून मी खूश झाले आहे. काँग्रेसकडून दिलेले गॅरंटी कार्ड निश्चितपणे राबविले जाणार आहे. नागरिकांना मदत करण्याची सर्वात जास्त गरज आहे. अशा लोकांपर्यंत योजनांची अंमलबजावणी करण्यासाठी मी आघाडीवर असेन. यावेळी मजगाव व अनगोळ परिसरातील नागरिकांनी गाठीभेटी घेऊन प्रभावती मास्तमर्डी यांना विधानसभा निवडणुकीत निवडून देण्याचा निर्धार केला. यावेळी समुदायाला भेडसावणाऱ्या समस्यांबाबत चर्चा करण्यात आली. पक्षाने समोर आणलेल्या नवीन चेहऱ्याला निवडून देण्यासाठी जनता ठाम आहे. मागील सरकारने प्रभागातील परिसर व विकासाकडे दुर्लक्ष केल्याचा आरोप प्रभावती मास्तमर्डी यांनी केला. लोकांनी पिण्याच्या पाण्याची समस्या, सांडपाण्याची व्यवस्था, महागाई यांच्या विरोधात आंदोलन छेडत सरकारकडे गाऱ्हाणे मांडले. या समस्या फक्त काँग्रेस सरकारच सोडवू शकते. त्यासाठी काँग्रेसलाच मतदान करा. काँग्रेस प्रशासनाकडून दक्षिण भागासाठी आखलेल्या प्रकल्पांचीही योजना राबविण्यात येणार आहे. यावेळी मजगाव व अनगोळ परिसरात प्रचारफेरी काढण्यात आली. यावेळी मतदारांनी त्यांना उत्स्फूर्तपणे पाठिंबा व्यक्त केला.