मराठा आरक्षणासाठी राज्यभरात सरकारवर दबाव येत असताना आज मराठा आंदोलनात सक्रिय असलेल्य़ा आंदोलकाने आत्महत्या केल्याची धक्कादायक बातमी समोर येत आहे. सुनिल कावळे असे नाव असलेल्या या मराठा आंदोलकांने मुंबईच्या वांद्रे पूर्वेकडील पश्चिम द्रुतगती महामार्गावरील उड्डाणपुलावर गळफास घेऊन आत्महत्या केली आहे. या संबंधिची माहीती मराठा क्रांती मोर्चाचे समन्वयक विनोद पाटील यांनी आपल्या ट्विटर ( X ) या समाजमाध्यमावर पोस्ट करून दिली. तसेच या आत्महत्येची जबाबदारी सरकारने घ्यावी असेही आंदोलकांकडून मगाणी केली गेली आहे.
सुनिल कावळे ( Sunil Kawale ) हा तरुण मुळाचा जालना जिल्ह्यातील अंबड तालुक्यातील असून त्याच्याकडे असलेल्या बॅगेमध्य़े आढळलेल्य़ा चिठ्ठीमध्ये त्याने सर्वांची माफी मागितली आहे. पोलीस पंचनाम्यानंतर सुनिल कावळे यांचे पार्थिव उत्तरीय तपासणीसाठी मुंबईच्या सायन रुग्णालयात नेण्यात आले आहे. या प्रकरणी खेरवाडी पोलीस स्थानकात गुन्हा दाखल करण्यात आला आहे.
त्यानंतर मराठा क्रांती मोर्चाचे समन्वयक विनोद पाटील यांनी मयत सुनिल कावळे याने मराठा आरक्षणासाठी आत्महत्या केल्याचा दावा केला आहे. आपल्या ट्विटर (X) या माध्यमांवर त्यांनी एक पोस्ट लिहून या घटनेची माहीती दिली आहे. ते म्हणाले, “आज जालना जिल्ह्यातील मराठा आंदोलनात सक्रिय युवक सुनील बाबुराव कावळे यांनी मुंबईत आत्महत्या केली. माझ्या मराठा बांधवांनो, आपल्या मागण्या मंजूर करून घेण्याचा हा योग्य मार्ग नाही. काळाच्या छाताडावर बसून अनेक संग्राम आपल्या या लढवय्या जातीने इतिहासात जिंकले आहेत….खचून जाऊ नका…लढाई अर्ध्यावर टाकून तर जाऊच नका! सरकारला विनंती की, यापुढे हा विषय अधिक गंभीर होत जाणार आहे. मराठा आरक्षण हा विषय आमच्या जगण्याशी संबंधित आहे, हे आता तरी मान्य करा. एवढे बळी गेल्यावरही तुम्हाला जाग येत नाही. यापेक्षा मराठा युवकांच्या आत्महत्या होऊ नये, यासाठी सरकारने तात्काळ पाऊले उचलावी. नाहीतर उद्रेक अटळ आहे. हुतात्मा सुनील बाबुराव कावळे यांना भावपूर्ण श्रद्धांजली!” अशा भावना त्यांनी व्यक्त केल्या आहेत.
मराठा क्रांती मोर्चाच्या आंदोलकांने आत्महत्या केल्याने आरक्षणाच्या मागणीचे आंदोलन आता तापण्याची चिन्हे आहेत. यापुर्वीही मराठा आंदोलकांकडून अशा प्रकारच्या आत्महत्या करण्य़ात आल्याचा दावा केला जात आहे. मनोज जरांगे पाटील यांनी सरकारला दिलेल्या अल्टिमेटमनंतर ही आत्महत्या झाल्याने राजकिय वातावरण चांगलेच तापणार आहे.
