केंबाळी नाल्याजवळील रस्त्यावर पडलेल्या ख•dयांमुळे होत होते अपघात, वाहनधारकांतून समाधान
वार्ताहर /उचगाव
बेळगाव-वेंगुर्ले या मार्गावरील सुळगे (हिं.) गावाशेजारील केंबाळी नाल्याजवळील रस्ता तसेच बेळगुंदी फाट्याजवळील रस्ता खड्यातच हरवल्याने सदर ठिकाण म्हणजे मृत्यूचा सापळाच बनला होता. यासंदर्भात ‘तरुण भारत’मध्ये या रस्त्याची झालेली दुर्दशा या मथळ्याखाली वृत्त प्रसिद्ध होताच सार्वजनिक बांधकाम खात्याने दखल घेऊन खड्डा बुजवण्याचे काम पूर्ण केले. या मार्गावरून प्रवास करणाऱ्या वाहनधारकांतून व नागरिकांतून समाधान व्यक्त करण्यात येत आहे. या मार्गावरील अनेक ठिकाणी मोठमोठे खड्डा पडून त्यात पावसाचे पाणी साचले होते. परिणामी दुचाकी वाहनचालकांना याचा अंदाज येत नसल्याने या खड्यात वाहने अडकून पडून अपघाताची मालिकाच या ठिकाणी सुरू झाली होती. या संदर्भात ‘तरुण भारत’मधून वृत्त प्रसिद्ध होताच सार्वजनिक बांधकाम खात्याला जाग आली आणि त्यांनी तातडीने सदर खड्डा बुजविले. सुळगे गावाशेजारील केंबाळी नाल्याजवळ अर्धा किलोमीटर अंतराचा संपूर्ण रस्ता खड्यातच हरवल्याचे चित्र होते. जवळपास सहा ते सात फूट लांबीचे, आणि चार ते पाच फूट रुंदीचे व अर्धा ते एक फूट खोलीचे मोठमोठे खड्डा या रस्त्यावर पडल्याने यातून वाट शोधत रस्ता आक्रमण करत असताना प्रवाशांची तारांबळ उडत होती.
बेळगुंदी फाट्याजवळील खड्डा बुजविल्याने समाधान
बेळगाव-वेंगुर्ली मार्गावरील बेळगुंदी फाट्यानजीक, गणेश दूध संकलन केंद्राजवळील या मुख्य वळणावरतीच जवळपास दहा फूट लांबीचा व तीन ते पाच फूट रुंदीचा आणि जवळपास एक फूट खोलीचा मोठा खड्डा या ठिकाणी पडलेला होता. या खड्याचा अंदाज येत नसल्याने पडून दुखापत झाल्याच्या घटना सातत्याने घडत होत्या. बेळगुंदी फाट्यावरून येणारी जोरदार वाहने या खड्यात अडकल्याचेही चित्र दिसून येत होते. सदर खड्डा बुजविल्याने प्रवासीवर्गातून समाधान व्यक्त करण्यात येत आहे.
