पुणे : पुण्यातील येरवडा कारागृहात एका कैद्याने ब्लेडने स्वतःला गंभीर जखमी करत आत्महत्या करण्याचा प्रयत्न केला. याप्रकरणी कैदी धनंजय राजाराम दिघे याच्यावर येरवडा पोलीस ठाण्यात कारागृह प्रशासनातर्फे गुन्हा दाखल करण्यात आला आहे. याबाबत कारागृहाच्या वतीने निशा दिलीप कुमार श्रेयकर (वय 32, रा. येरवडा, पुणे) यांनी तक्रार दाखल केली आहे.
पोलिसांनी दिलेल्या माहितीनुसार, कैदी धनंजय दिघे हा सध्या येरवडा खुल्या कारागृहात शिक्षा भोगत आहे. त्याची मानसिक स्थिती ठीक नाही. त्याने कारागृहातील मुद्रणालयाच्या मागील बाजूस पाण्याच्या हौदाजवळ पडलेल्या एका खराब ब्लेडने स्वतःच्या डाव्या हातावर वार करत स्वत:ला गंभीर जखमी करत आत्महत्या करण्याचा प्रयत्न केला. याबाबतची माहिती कारागृहातील अधिकाऱ्यांना समजताच त्यांनी घटनास्थळी धाव घेत कैद्याला तातडीने रुग्णालयात दाखल केले. या प्रकरणाचा पुढील तपास पोलीस उपनिरीक्षक एस लिंगे करत आहेत.
