पॅराग्वेची जलतरणपटू ऑलिम्पिकमधून बाहेर
वृत्तसंस्था/ पॅरिस
सध्या पॅरिस ऑलिम्पिक सुरु असून या स्पर्धेची जगभरात जोरदार चर्चा आहे. यंदाच्या ऑलिम्पिकमध्ये रोज काही ना काही घडत असल्याने चर्चांना उधाण आल आहे. ऑलिम्पिकच्या एका नियमामुळे अवघे 50 ग्रॅम वजन अधिक भरल्याने भारताची स्टार कुस्तीपटू विनेश फोगाटला अपात्र ठरवण्यात आले आहे. हे प्रकरण ताजे असतानाच आणखी एक प्रकरण समोर आले आहे. केवळ दिसायला प्रचंड सुंदर असल्याने पॅराग्वेच्या एका महिला स्विमरला पॅरिस ऑलिम्पिकमधून मायदेशी पाठवण्यात आले आहे. लुआना अलोन्सो असे तरुण पॅराग्वेयन महिला स्विमरचे नाव आहे.
सूत्रांनी दिलेल्या माहितीनुसार, ऑलिम्पिकमध्ये सहभागी होण्यासाठी आलेल्या काही खेळाडूंनी लुआनाच्या सौंदर्याबाबत आयोजकांकडे तक्रार केली होती. खेळाडूंनी सांगितले की, लुआना इतकी सुंदर आहे की त्यांना खेळावर लक्ष केंद्रित करता येत नव्हते. अशी तक्रार दाखल केल्यानंतर जेव्हा अधिकाऱ्यांनी याची दखल घेतली तेव्हा त्यांनाही लुआनाच्या सौंदर्याचा अनुभव आला. लुआनाच्या सौंदर्याचा खेळाडूंच्या खेळावर परिणाम होऊ शकतो. जर खेळाडूंनी खेळावर लक्ष केंद्रित केले नाही तर पदक जिंकण्याची देशाची आशा पूर्ण होणार नाही. त्यामुळे लुआनाला मायदेशी पाठवण्यात आल्याचे पॅराग्वेच्या ऑलिम्पिक समितीने स्पष्ट केले आहे.
अफाट सौंदर्य, क्रीडाग्राममधील अधिकारीही दिवाणे
लुआना ही जलतरणपटू आहे आणि तिने 100 मीटर बटरफ्लाय स्पर्धेत भाग घेतला होता, परंतु ती केवळ 0.24 सेकंदांनी पात्रता गमावली. विशेष म्हणजे, ती दिसायला इतकी सुंदर आहे की ऑलिम्पिक क्रीडाग्राममधील अधिकारीही तिचे सौंदर्य पाहून दिवाणे झाले आहेत. क्रीडाग्राममधून बाहेर पडल्यानंतर खेळाडूही तिचे अफलातून सौंदर्य पाहून चकित झाले आहेत. अर्थात, तिच्याविरुद्ध तक्रार दाखल झाल्यानंतर पॅराग्वे प्रशासनाने तत्काळ तिला मायदेशी पाठवले आहे. दरम्यान, मायदेशी परतल्यानंतर अलोन्सोने जलतरणातून निवृत्तीची घोषणा करून सर्वांना आश्चर्यचकित केले. तिने आपल्या चाहत्यांच्या पाठिंब्याबद्दल आभार मानले, परंतु ऑलिम्पिक व्हिलेज सोडण्याबद्दल अद्याप कोणतेही भाष्य केलेले नाही.
दरम्यान, पॅराग्वे ऑलिम्पिक समितीच्या प्रमुख लॅरिसा शेरर म्हणाल्या, आम्ही दिलेल्या सूचनेनुसार तिने ऑलिम्पिक गाव सोडल्याबद्दल आम्ही तिचे आभार मानतो, तसेच तिने मायदेशी परतण्याचा निर्णय घेतल्याने संघासाठी चांगले झाले आहे. आता संघातील इतर खेळाडू त्यांच्या खेळावर चांगले लक्ष्य केंद्रित करू शकतील.
