मिचेल स्टार्कचा असाही अनोखा विक्रम

लखनौच्या इकाना स्टेडियमवर झालेल्या सामन्यात ऑस्ट्रेलियाने वर्ल्डकपमधील पहिल्या विजयाची नोंद केली. या सामन्यात ऑस्ट्रेलियाचा अनुभवी वेगवान गोलंदाज मिचेल स्टार्कने दोन बळी मिळवले. यासोबतच त्याने विश्वचषक स्पर्धेत अनोख्या विक्रमाची नोंद केली आहे. स्टार्कने या विश्वचषकात भारताविरुद्ध एक तर दक्षिण आफ्रिकेविरुद्ध दोन बळी मिळवले आहेत. त्यानंतर लंकेविरुद्ध दोन बळी घेत त्याने या वर्ल्डकपमधील आपल्या बळींची संख्या पाचपर्यंत नेली आहे. 2015 मध्ये आपला पहिला विश्वचषक खेळताना त्याने 25 बळी घेत मालिकावीर पुरस्कार जिंकला होता. यानंतर 2019 च्या वर्ल्डकपमध्ये त्याने 24 बळी घेतले होते. त्यानंतर यंदाच्या वर्ल्डकपमध्ये देखील त्याने पाच बळी मिळवले आहेत. स्टार्कच्या नावे आता विश्वचषकात 54 बळी झाले आहेत. दरम्यान, या कामगिरीसह वर्ल्डकपमध्ये सर्वाधिक बळी मिळवणाऱ्या गोलंदाजांच्या यादीत स्टार्क पाचव्या क्रमांकावर पोहोचला आहे. या यादीमध्ये ऑस्ट्रेलियाचा ग्लेन मॅकग्रा 71 बळींसह पहिल्या क्रमांकावर तर श्रीलंकेच्या मुथय्या मुरलीधरन 68 बळीसह दुसऱ्या, लंकेचा लसिथ मलिंगा 56 बळीसह तिसऱ्या तर पाकिस्तानचा वसीम अक्रम 55 बळीसह चौथ्या स्थानावर आहे.