अशीही चीनी अंधश्रद्धा

वादळांमुळे मोठ्या प्रमाणात जीवीत आणि वित्त हानी होते, हे माणसाला पुरातन काळापासून परिचित आहे. अलिकडच्या काळात वादळाची पूर्वकल्पना देणारे तंत्रज्ञान विकसीत झाल्याने हानीचे प्रमाण कमी करता येते. पण ती पूर्णपणे थांबविता येत नाही. पूर्वीच्या काळी असे तंत्रज्ञान नसल्याने वादळांना दैवी कोप मानण्याची प्रथा होमी, जी आजही काही प्रमाणात टिकून आहे. अगदी चीनसारखा ‘प्रगत’ देशही यापासून मुक्त नाही. नुकतेच चीनमध्ये ‘रगसा’ नामक वादळ येऊन केले. हाँगकाँग आणि दक्षिण चीन भागात या वादळाने बराच प्रभाव दाखविला आहे. या वादळापासून आपले संरक्षण व्हावे, म्हणून अनेक चीनी नागरीकांनी एक आश्चर्यकारक वाटेल असा उपाय शोधला होता. चीनमधील एक लोकप्रिय अभिनेता निकोलस त्से हा आहे. त्याची छायाचित्रे वादळग्रस्त भागातील लोकांनी आपल्या घरांच्या खिडक्यांना लावली होती. ही छायाचित्रे आपले आणि आपल्या घरांचे संरक्षण करतील, असा त्यांचा ठाम विश्वास होता. आता या उपायामुळे किती जणांचे संरक्षण झाले, हा विषय वेगळा आहे. वादळ शमल्यानंतर निकोलस त्सेनेच ते शमविले, अशीही प्रतिक्रिया अनेकांनी व्यक्त केली. तसेच ‘वारा थांबविण्यासाठी धन्यवाद’ असे संदेशही झळकले. पण प्रत्यक्ष चीनमध्येच आता या उपायाची चेष्टा होत आहे. चीनी सोशल मिडियावर अनेक मीम्स प्रसारित करण्यात आले आहेत. निकोलस त्से याची मात्र या साऱ्या प्रकरणामध्ये मोठीच प्रसिद्धी होत आहे. निकोलस त्से हा चीनमध्घल लोकप्रिय अभिनेता असून त्याला मानणाऱ्यांचा मोठा वर्ग आहे. भारतात, विशेषत: दक्षिण भारतात ज्याप्रमाणे अभिनेत्यांना देवत्व देण्याची प्रथा आहे, त्याप्रमाणे ती काही प्रमाणात चीनमध्येही आहे. त्याचेच प्रत्यंतर या वादळाच्या निमित्ताने येत आहे. निकोलस त्से हा सध्या दक्षिण चीन भागात एक महत्वाचा ‘ट्रेंड’ म्हणून प्रसिद्ध होत असल्याचे दिसून येत आहे.