लेकव्ह्यू हॉस्पिटलमध्ये यशस्वी शस्त्रक्रिया

बेळगाव : भालाफेक स्पर्धेतील 15 वर्षांच्या खेळाडूच्या पाठीला भाला टोचल्याने त्याला जबर इजा झाली. या मुलाच्या स्पायनल कॅनॉलमध्ये असलेल्या हाडाचा तुकडा काढून त्याच्या मणक्याची यशस्वी शस्त्रक्रिया लेकव्ह्यू हॉस्पिटलचे वरिष्ठ सल्लागार व ब्रेन आणि स्पाईन सर्जन डॉ. रविराज घोरपडे यांनी केली. जागतिक मणक्याच्या दुखापतीच्या दिवशीच ही शस्त्रक्रिया करण्यात आली. मणक्याची जखम कधी कधी गंभीर स्वरुप धारण करते. त्यामुळे वेळेवर डॉक्टरांचा सल्ला घेणे आवश्यक आहे. भालाफेक स्पर्धेसारखे खेळ किंवा अन्य तीक्ष्ण वस्तूंचा वापर करून खेळल्या जाणाऱ्या खेळांमध्ये काळजी घेणे गरजचे असून पालक व प्रशिक्षक यांनी त्यांना त्याबद्दल माहिती दिली पाहिजे, असे डॉ.   घोरपडे म्हणाले. सदर मुलगा आता वॉकरच्या साहाय्याने हालचाल करू शकत आहे. तो पूर्णपणे बरा होईल, असा विश्वास त्यांनी व्यक्त केला.