नमन पाटील, कृष्णा कुलकर्णी, सायली यांना वैयक्तिक विजेतेपद
बेळगाव : गोवा येथील आर्दी जलतरण अकादमी आयोजित निमंत्रितांच्या आंतरराज्य जलतरण स्पर्धेत बेळगावच्या पॅशनेट स्पोर्ट्स अकादमीच्या जलतरणपटूंनी घवघवीत यश संपादन केले आहे. सदर स्पर्धेत कृष्णा प्रसाद कुलकर्णीने गट 5 मध्ये 50 मी. बॅकस्ट्रोकमध्ये सुवर्ण, 50 मी. बटरफ्लाय, 50 मी. ब्रेस्टट्रोक, 50 मी. फ्रीस्टाईल या तिन्ही प्रकारात तीन रौप्य पदकासह गटामध्ये वैयक्तिक विजेतेपद पटकाविले. नमन नंदकुमार पाटील गट 5 मध्ये 50 मी. फ्रिस्टाईल, 50 मी. बॅकस्ट्रोक, 50 मी. ब्रेस्टस्ट्रोक तिन्ही प्रकारात सुवर्ण, 50 मी. बटरफ्लाय, 4×50 मी. मिक्स मिडले रिले या दोन्ही प्रकारात कास्य पदकासह गटातील वैयक्तिक विजेतेपद पटकावित सर्वात जलद जलतरणपटूचा मान मिळविला.
सायली सागर घुंगरेकरने 50 व 100 मी. बॅकस्ट्रोक, 50 मी. वैयक्तिक मिडले प्रकारात तीन सुवर्ण पदके, 50 मी. फ्रिस्टाईल व 4×100 मिक्स रिलेमध्ये दोन कास्य पदके, अथर्व पाटीलने गट 2 मध्ये 4×50 मी. रिलेमध्ये कास्य, स्वरा वांगेकरने गट 2 मध्ये 4×50 मी. मिडले रिलेने कास्य, उनीत वांगेकरने गट 4 मध्ये 4×50 मी. मिडले रिलेमध्ये कास्य, यश पाटुकलेने गट 6 मध्ये 50 मी. बॅकस्ट्रोक व 50 मी. फ्रिस्टाईलमध्ये दोन कास्य तर ओम पाटुकलेने गट 3 मध्ये 100 मी. बटरफ्लाय, 50 मी. बॅकस्ट्रोक, 50 मी. ब्रेस्टस्ट्रोक 3 रौप्य पदके पटकाविली. या स्पर्धेत कृष्णा कुलकर्णी, नमन पाटील व सायली घुंगरेकर यांनी वैयक्तिक विजेतेपद मिळविले. या सर्व जलतरणपटूंना जलतरण एनआयएस प्रशिक्षक शामसुंदर मालाई, संदीप मालाई, विरु गवळी व मनोज जाधव यांचे मार्गदर्शन मिळत आहे.
