परिवहन मंत्री प्रताप सरनाईक यांची घोषणा
कोल्हापूर
राज्यातील सर्व महापालिका क्षेत्रामध्ये यापुढे उपप्रादेशिक परिवहन कार्यालय सुरू करण्यात येईल, अशी घोषणा परिवहन मंत्री प्रताप सरनाईक यांनी केली आहे. मीरा-भाईंदर येथे एसटी महामंडळ, परिवहन विभाग व मीरा-भाईंदर महापालिकेच्या वरिष्ठ अधिकारी यांच्या बैठकीनंतर ते पत्रकारांशी बोलत होते.
मंत्री सरनाईक म्हणाले, महापालिका क्षेत्रामध्ये लोकसंख्या झपाट्याने वाढत आहे. याचा विचार करता प्रत्येक महापालिका क्षेत्रामध्ये एक उपप्रदेशिक कार्यालय असावे, या मागणीने जोर धरला होता. त्यामुळे भविष्यात जिह्याच्या ठिकाणी जाऊन परिवहन संबंधित कामे करण्याची महापालिका क्षेत्रातील सर्वसामान्य जनतेला तसदी घ्यावी लागणार नाही. ती सर्व कामे आता महापालिका क्षेत्रामध्ये त्यांना करणे शक्य होणार आहे. परिवहन विभागाचे आयुक्त विवेक भीमनवार, मीरा-भाईंदर महापालिकेचे आयुक्त संजय काटकर व एसटी महामंडळाचे उपाध्यक्ष व व्यवस्थापकीय संचालक डॉ. माधव कुसेकर हे अधिकारी उपस्थित होते.
प्रत्येक जिल्ह्यात स्वयंचलित संगणकीय वाहन चाचणी केंद्र
मीरा-भाईंदर येथील उत्तन येथे महसूल विभागाकडून परिवहन विभागाला हस्तांतरित होणाऱ्या 9700 चौरस मीटर जागेवर स्वयंचलित संगणकीय वाहन चाचणी केंद्र उभारण्यात येणार आहे. त्या जोडीला स्वयंचलित वाहन चालक चाचणी मार्ग देखील उभारला जाणार आहे. अशी चाचणी केंद्रे राज्यभरात प्रत्येक जिह्याच्या ठिकाणी उभारण्यात येणार असल्याचा धोरणात्मक निर्णय यावेळी घेण्यात आला.
आरक्षण केंद्र रात्री 10 पर्यंत सुरू ठेवा
मीराभाईंदर-पश्चिम येथील एसटीच्या जागेची पाहणी करताना मंत्री प्रताप सरनाईक यांच्याकडे एका प्रवाश्याने एसटीचे संगणकीय आरक्षण केंद्र दुपारी 3 वाजेपर्यंतच सुरू असते, संध्याकाळी येणाऱ्या प्रवाशांना संगणकीय आरक्षण केंद्रावर तिकीट उपलब्ध होत नाही, अशी तक्रार केली. यावेळी उपस्थित असणाऱ्या एसटी अधिकाऱ्यांना तिथेच आदेश देऊन आजपासूनच सकाळी 6 ते रात्री 10 वाजेपर्यंत संगणकीय आरक्षण केंद्र सुरू ठेवण्याचे आदेश मंत्री सरनाईक यांनी दिले.
