ख्रिश्चन बांधवांना संरक्षण द्या : केंद्राने त्वरित पुढाकार घेण्याची मागणी : कॅन्डल मार्च काढून मृतांना वाहिली श्रद्धांजली
बेळगाव : मणिपूर येथे सुरू असलेला हिंसाचार त्वरित थांबविण्यात यावा. या हिंसाचाराच्या घटनेत निष्पाप नागरिकांचा बळी गेला आहे. याबरोबरच मोठ्या प्रमाणात वित्तहानी झाली आहे. याची संबंधित नागरिकांना नुकसानभरपाई करून देवून शांती व सौहार्दता प्रस्थापित करण्यासाठी केंद्र सरकारने त्वरित पुढाकार घ्यावा. या पार्श्वभूमीवर ख्रिश्चन बांधवांतर्फे कॅन्डल मार्च काढून मृतांना श्रद्धांजली वाहिली. यानंतर राष्ट्रपती दौप्रदी मुर्मू यांच्या नावे जिल्हाधिकाऱ्यांना निवेदन देण्यात आले आहे. मणिपूर हिंसाचाराच्या घटनेच्या पार्श्वभूमिवर बेलगाम पास्टर्स अॅण्ड ख्रिश्चन लिडर्स असोसिएशन यांच्यातर्फे सदर निवेदन सादर करण्यात आले आहे. तत्पूर्वी येथील मेथाडीस चर्च येथे प्रार्थना करून मणिपूर हिंसाचार घटनेबद्दल दु:ख व्यक्त करण्यात आले. यानंतर येथून कॅन्डल मार्च रॅलीला प्रारंभ करण्यात आला. आरटीओ सर्कलमार्गे चन्नम्मा सर्कल येथे जमून मृतांना श्रद्धांजली वाहण्यात आली.
हिंसाचारात अपरिमित हानी
मणिपूर येथील घटनेमध्ये दोन समुदायात सुरू असलेल्या हिंसाचाराच्या घटनेत अपरिमित हानी झाली आहे. निष्पापांचा बळी गेला आहे. यामध्ये अनेक जण बेघर झाले आहेत. त्यामुळे कायदा व सुव्यवस्था पूर्णपणे बिघडली आहे. यापूर्वी कधीही न झालेला हिंसाचार झाला आहे. जवळपास 112 नागरिकांचा मृत्यू झाला आहे. 197 गावे जाळण्यात आली आहेत. 7 हजारांपेक्षा अधिक घरे जाळली गेली आहेत. 359 चर्च आणि ख्रिश्चन समुदायांवर हल्ले करण्यात आले आहेत. 41 हजार 425 पेक्षा अधिक नागरिक बेघर झाले आहेत. त्यामुळे तेथील परिस्थिती अत्यंत कठीण झाली आहे. शाळा, महाविद्यालये बंद झाली आहेत. अशा संस्थांचेही मोठ्या प्रमाणात नुकसान करण्यात आले आहे. केंद्र सरकारने त्वरित मध्यस्ती करून शांतता प्रस्तापित करावी, अशी मागणी करण्यात आली आहे.
मध्यस्ती करून तोडगा काढा
केंद्र सरकारने मध्यस्ती करून कायदा सुव्यवस्था राखण्यास पुढाकार घ्यावा. सरकारने मध्यस्ती करून योग्य प्रकारे तोडगा काढावा, घटनेतील नुकसानग्रस्तांना न्याय द्यावा. प्रत्येक नागरिकाला झालेल्या नुकसानीची भरपाई द्यावी. प्रशासनाने व संघ, संस्थांनी मानवतेसाठी कार्य करावे, ख्रिस्ती बांधवांना न्याय द्यावा, सामान्य नागरिकांना संरक्षण देवून घरांचे झालेले नुकसान, शिक्षण संस्था, रुग्णालये यांना संरक्षण द्यावे, अशी मागणीही करण्यात आली. यावेळी युनाटेड ख्रिश्चन फोरम फॉर व्ह्यूमन राईटचे बिशप डेरीक फर्नांडिस यांनी उपस्थित ख्रिश्चन बांधवांना मार्गदर्शन केले. याप्रसंगी पास्टर्स अॅण्ड ख्रिश्चन लीडर असोसिएशनचे टी. थॉमस, अॅड. एम. रमेश, यबनायझर करबण्णावर, रेव्ह. सुधाकर, रेव्ह. शंकर सौंदत्ती, रेव्ह. बेन्निजेम्स्, क्लारा फर्नांडीस, फादर प्रमोद आदी उपस्थित होते.
जैनमुनी हत्या प्रकरणाचाही निषेध
शांती व अहिंसेसाठी कार्य करणाऱ्या चिकोडी हिरेकोडी येथील जैनमुनी कामकुमारनंदी यांची निर्घृण हत्या करण्यात आली आहे. अशा समाजसेवी मुनींची झालेली हत्या अत्यंत दु:खद घटना आहे. या घटनेतील आरोपींना कडक शासन करावे, अशी मागणीही बिशप डेरीक फर्नांडिस यांनी केली.
