मयेतील धोकादायक झाडे हटविण्यास प्रारंभ

डिचोली : मये पंचायत क्षेत्रात रस्त्याच्या शेजारी असलेली जुनाट झालेली धोकादायक स्थितीत उभी असलेली आठ धोकादायक झाडे हटविण्याच्या कामाला पंचायतीने सुरुवात केली आहे. या धोकादायक झाडांचा अहवाल डिचोली उपजिल्हाधिकारी यांना पाठविण्यात आला होता. व ती हटविण्यासाठी परवानगी मागण्यात आली होती. त्यानुसार हि झाडे आता कापण्यात येत असल्याचे सांगण्यात आले. गेल्या 2009 साली हळदणवाडी मये येथे होबळे नामक एक व्यक्तीवर रस्त्यावरून दुचाकीने जात असताना झाड पडल्याने त्यांचा मृत्यू झाला होता. त्यानंतर अनेकवेळा अशी जर्जर बनून धोकादायकपणे उभी असलेली झाडे रस्त्यांवर पडली होती. कोणत्याही प्रकारची जीवीतहानी मात्र झाली नव्हती. परंतु वाहतूक ठप्प होण्याचे प्रकार घडले होतो. तसेच वीज खात्याचे नुकसान झाले होते. या पावसापूर्वी मये गावातील मुख्य रस्त्याला लागून असलेली धोकादायक स्थितीतील झाडे हटविण्यात यावी, अशी मागणी मयेवासीयांकडून करण्यात येत होती. या संदर्भात पंचायतीच्या ग्रामसभेत ठराव घेण्यात आला होता. त्यानुसार पंचायतीने या धोकादायक झाडांची यादी तयार करून ती उपजिल्हाधिकारी कार्यालयाला पाठवली होती. त्याची प्रक्रिया पूर्ण झाल्यावर लगेच ही झाडे हटविण्याचे काम हाती घेण्यात आले. मयेतील मुख्य रस्त्याला लागेन असलेली आठ झाडे धोकादायक आहेत. सध्या केळबाईवाडा मये येथील दोन झाडे कापण्याच्या कामाला प्रारंभ करण्यात आला आहे. त्यानंतर टप्प्याटप्प्याने इतरही झाडे हटवली जाणार आहेत, अशी माहिती सरपंच सुवर्णा तुळशीदास चोडणकर यांनी दिली. यावेळी पंचसदस्य विद्यानंद कारबोटकर, माजी सरपंच तुळशीदास चोडणकर यांचीही उपस्थिती होती.