पावसामुळे दिल्लीत 15 वर्षांचा, अजमेरमध्ये 14 वर्षांचा विक्रम मोडला : उत्तर प्रदेशात शाळा बंद; मध्यप्रदेशात गारा पडल्या
वृत्तसंस्था/ नवी दिल्ली, श्रीनगर
दिल्ली-एनसीआरसह उत्तर भारतातील अनेक राज्यांमध्ये शुक्रवारी पाऊस झाला. तसेच पर्वतीय राज्यांमध्ये डोंगराळ भागात हिमवृष्टी सुरूच आहे. बर्फवृष्टीमुळे श्रीनगर-लेह महामार्ग आणि मुघल रोड बंद करण्यात आला आहे. श्रीनगर-जम्मू राष्ट्रीय महामार्गावर दोन हजार वाहने अडकली. शनिवारी सकाळी जोरदार हिमवृष्टीमुळे श्रीनगर विमानतळावरील 80 टक्के उड्डाणे रद्द करण्यात आली. दाट धुक्यामुळे दिल्लीत 14 रेल्वे शनिवारी विलंबाने धावत होत्या. दरम्यान, हवामान खात्याने पुन्हा एकदा अनेक राज्यांमध्ये पावसाचा यलो अलर्ट जारी केला आहे.
जम्मू-काश्मीरच्या गुलमर्ग आणि तनमर्गमध्ये बर्फवृष्टीमुळे अडकलेल्या 68 पर्यटकांची लष्कराने शुक्रवारी रात्री उशिरा सुटका केली. अचानक मुसळधार बर्फवृष्टी आणि रस्ते बंद झाल्यामुळे 30 महिला आणि 8 मुलांसह 68 पर्यटक अडकले असल्याचे लष्कराने सांगितले. त्यांची सुटका करून सुरक्षित स्थळी नेण्यात आले. त्यांना निवारा आणि औषधेही देण्यात आली.
दिल्लीत शुक्रवारी 24 तासांत 9.1 मिमी पावसाची नोंद झाली. गेल्या 15 वर्षांतील डिसेंबर महिन्यातील हा सर्वाधिक पाऊस होता. त्याचवेळी, राजस्थानमधील अजमेरमध्ये डिसेंबर महिन्यात गेल्या 24 तासात 21.4 मिमीपेक्षा जास्त पावसाची नोंद झाली आहे. गेल्या 14 वर्षांतील डिसेंबरमधील हा सर्वाधिक पाऊस आहे. उत्तर प्रदेशात मुजफ्फरपूरमध्ये मुसळधार पावसामुळे एक घर कोसळून एका महिलेचा मृत्यू झाला. पाऊस आणि थंडीमुळे गाझियाबाद-मेरठमध्ये आठवीपर्यंतच्या शाळांना सुटी देण्यात आली. मध्यप्रदेशातील अनेक जिल्ह्यांमध्येही शनिवारी पाऊस झाला. रतलाम, मंदसौर, बैतूल, अलीराजपूरसह अनेक जिह्यांमध्ये पावसासोबतच गारपीटही झाली. हवामान विभागाने दिलेल्या माहितीनुसार, दिल्ली-एनसीआरसह उत्तर प्रदेश, हरियाणा, पंजाब, राजस्थान, गुजरात, मध्यप्रदेश आणि महाराष्ट्राच्या अनेक भागात पाऊस पडू शकतो.
हवामान खात्याचा अंदाज
जम्मू काश्मीरमध्ये 29 ते 31 डिसेंबर दरम्यान हवामान प्रामुख्याने कोरडे राहील, तर 1 ते 5 जानेवारी दरम्यान काश्मीरमध्ये काही ठिकाणी हलकी बर्फवृष्टी होऊ शकते, असे हवामान खात्याने म्हटले आहे. हिमाचल प्रदेशमध्येही ऑरेंज अलर्ट जारी करण्यात आला. तसेच उत्तराखंडच्या डोंगराळ जिह्यांमध्ये थंडीची लाट आणि मुसळधार बर्फवृष्टी होण्याची शक्यता आहे. बदलत्या वातावरणाच्या पार्श्वभूमीवर चमोलीतील सर्व शासकीय, निमसरकारी शाळा आणि अंगणवाडी केंद्रांना सुटी जाहीर करण्यात आली आहे.
