भवानीनगर परिसरात समितीला उत्स्फूर्त प्रतिसाद

बेळगाव : सीमाभागाचा संघर्ष हा सीमाभागातील प्रत्येक मराठी भाषिकाच्या रक्तातून निर्माण झाला आहे. सीमाप्रश्नासाठी अनेकांनी हौतात्म्य पत्करले. त्यांचे हौतात्म्य अजिबात वाया जाता कामा नये. मराठी भाषिकांनी आपल्या मातृभाषेची अस्मिता जपणे गरजेचे असून प्रत्येक माणसाने घरातून बाहेर पडून भगव्या झेंड्याखाली एकत्र यावे, असे आवाहन दक्षिण मतदार संघातील कार्यकर्त्यांना करण्यात आले. दक्षिण मतदार संघातील म. ए. समितीचे अधिकृत उमेदवार रमाकांत कोंडुस्कर यांना विजयी करायचे आहे. आतापर्यंत सर्वांनी पाठिंबा दर्शविला आहे. मात्र, गाफील न राहता कोणत्याही परिस्थितीत त्यांना विजयी करायचे असून सर्वांनी म. ए. समितीच्या उमेदवाराला विजयी करण्याचा निर्धार यावेळी केला.  भवानीनगर, चन्नम्मानगर, गुरुप्रसाद कॉलनी, वाटवे कॉलनी, कावेरीनगर, पार्वतीनगर, जैतनमाळ, सुभाषचंद्रनगर परिसरात भव्य प्रचारफेरी काढण्यात आली. हिंदुनगर येथे सांगता करण्यात आली. छत्रपती शिवाजी महाराज, डॉ. आंबेडकर, महात्मा फुले, छ. शाहू महाराज यांच्या प्रतिमांचे पूजन रमाकांत कोंडुस्कर यांच्या हस्ते करून पदयात्रेला सुरुवात झाली. त्यानंतर अनेक नगरांमध्ये उत्साही स्वागत करण्यात आले. माजी महापौर आप्पासाहेब पुजारी, उपमहापौर मधुश्री पुजारी, माजी नगरसेवक दिनेश राऊळ, सचिन गोरले, पिराजी शिंदे, प्रथमेश तारिहाळकर, अमर पाटील, अरुण मालवणकर, अनिल पाटील, शिवाजी माने, आकाश पाटील, महानंदा मालवणकर, रेणूका गाडेकर, अक्षया मालवणकर, भाग्यश्री मालवणकर, अर्चना पाटील, अरुण कित्तूर यांच्यासह आजी-माजी नगरसेवक उपस्थित होते. या सर्वांनी पाठिंबा दिला आहे.