‘सायली राजाध्यक्ष सारीज’ प्रदर्शनाला उत्स्फूर्त प्रतिसाद

बेळगाव : साडी हा महिलांचा जिव्हाळ्याचा विषय. आज विविध प्रकारच्या साड्या उपलब्ध होतात. परंतु, बऱ्याचशा साड्या बेळगावसारख्या शहरात पोहोचत नाहीत. त्यामुळे मुंबई येथील ‘सायली राजाध्यक्ष सारीज’ यांच्या ब्रँडेड साड्यांचे प्रदर्शन रविवारी अयोध्यानगर येथील हॉटेल युके-27 फर्न येथे झाले. बेळगावसह  परिसरातील महिलांनी हजेरी लावत साड्यांची खरेदी केली. ‘सायली राजाध्यक्ष सारीज’ यांच्या साड्यांचे प्रदर्शन पहिल्यांदाच बेळगावमध्ये झाले. डॉ. अनुपमा जोशी यांच्या क्रिएटिव्ह सोल्सतर्फे हे प्रदर्शन भरविले होते. सायली सारीजमध्ये हँडलूम, हँडब्लॉकचे कपडे विक्रीसाठी ठेवण्यात आले होते. हँडलूममध्ये कांजीवरम, बनारसी, टसर, सिल्क, रॉ सिल्क, सॉफ्ट सिल्क, गढवाल असे प्रकार उपलब्ध आहेत. याशिवाय कॉटनमध्ये कांची कॉटन, कॉटन इलकल, पट्टेदा, अंचु कॉटन, पैठण्या यांची विक्री करण्यात आली. रविवारी सकाळी सायली राजाध्यक्ष व डॉ. अनुपमा जोशी यांच्या हस्ते गणेशपूजन करून प्रदर्शनाचे उद्घाटन करण्यात आले. प्रदर्शनाला बेळगावबरोबरच पुणे, कोल्हापूर, हुबळी, धारवाड, गोवा येथील ग्राहकांनी हजेरी लावली होती. महिलांसोबतच पुरुषांसाठीही हँडब्लॉक शर्ट्सची विक्री होत होती. डॉ. अनुपमा जोशी यांनी ग्राहकांचे आभार मानत यापुढेही भरभरून प्रतिसाद द्यावा, असे आवाहन केले. प्रदर्शनाला बेळगाव परिसरातील कॉर्पोरेट क्षेत्रातील महिला, डॉक्टर, प्राध्यापक, नोकरदार यासह मोठ्या संख्येने महिला उपस्थित होत्या.