लक्ष्मी हेब्बाळकर यांना बाळेकुंद्री गावातून उत्स्फूर्त प्रतिसाद

बेळगाव : ग्रामीणच्या काँग्रेसच्या उमेदवार लक्ष्मी हेब्बाळकर यांना बाळेकुंद्री के. एच. गावातून उत्स्फूर्त प्रतिसाद मिळाला. शुक्रवारी हेब्बाळकर यांची बाळेकुंद्री परिसरात भव्य प्रचारफेरी काढण्यात आली. या प्रचारफेरीत महिलांचा लक्षणीय सहभाग दिसून आला. ठिकठिकाणी लक्ष्मी हेब्बाळकर यांचे जल्लोषात स्वागत करण्यात येत होते. काँग्रेस सरकार महिलांसाठी, बेरोजगार तरुणांसाठी व सर्वसामान्य जनतेसाठी विविध योजना उपलब्ध करून देणार आहे. तसेच गेल्या पाच वर्षांत मी या भागात अनेक विकासकामे राबवलेली आहेत. त्यामुळे पुन्हा या भागाचा अधिकाधिक विकास करण्यासाठी मला निवडून द्या, असे लक्ष्मी हेब्बाळकर यांनी सांगितले. बाळेकुंद्री के. एच. गावच्यावतीने हेब्बाळकर यांना पाठिंबा दर्शविण्यात आला असून त्यांना मतदान करून विजयी करणार असल्याचा निर्धार उपस्थित महिला व कार्यकर्त्यांनी व्यक्त केला.