वृत्तसंस्था/ बेंगळूर
2023 च्या क्रिकेट हंगामातील दुलिप करंडक क्रिकेट स्पर्धेत दक्षिण विभागाने उत्तर विभागाचा दोन गड्यांनी पराभव करत अंतिम फेरीत प्रवेश मिळविला. आता दक्षिण विभाग व पश्चिम विभाग यांच्यात अंतिम सामना पुढील आठवड्यात खेळविला जाईल.
या सामन्यात उत्तर विभागाचा प. डाव 198 धावावर आटोपल्यानंतर दक्षिण विभागाने पहिल्या डावात 195 धावा जमवल्याने उत्तर विभागाला तीन धावांची आघाडी मिळाली. उत्तर विभागाने 2 बाद 51 या धावसंख्येवरून आपल्या दुसऱ्या डावाला पुढे सुरुवात केली आणि त्यांचा दुसरा डाव 56.4 षटकात 211 धावात आटोपला. प्रभसिमरन सिंगने 93 चेंडूत 11 चौकारासह 63, अंकितकुमारने 3 चौकारासह 26, हर्षित राणाने 1 षटकार आणि 4 चौकारासह 38, प्रशांत चोप्राने 4 चौकारासह 19, निशांत सिंधूने 2 चौकारासह 15 धावा जमवल्या. दक्षिण विभागातर्फे विजयकुमार विशाखने 76 धावात 5 तर साईकिशोरने 28 धावात 3 आणि कविरप्पाने 47 धावात 2 गडी बाद केले. दक्षिण विभागाला निर्णायक विजयासाठी 215 धावांचे आव्हान उत्तर विभागाकडून मिळाले. दिवसअखेर द. विभागाने दुसऱ्या डावात बिनबाद 21 धावा जमवल्या. साई सुदर्शन 5 तर मयांक अगरवाल 15 धावावर खेळत होते.
दक्षिण विभागाने शेवटच्या दिवशीच्या खेळाला पुढे प्रारंभ केला आणि त्यांनी 8 बाद 219 धावा जमवत हा सामना दोन गड्यांनी जिंकला. मयांक अगरवालने 7 चौकारासह 54, कर्णधार हनुमा विहारीने 8 चौकारासह 43, रिकी भुईने 1 षटकार आणि 3 चौकारासह 34, तिलक वर्माने 2 षटकारासह 25, साई किशोरने 2 षटकारासह नाबाद 15 धावा जमवल्या. उत्तर विभागातर्फे हर्षित राणाने 3 तर बालतेज सिंग, वैभव अरोरा यांनी प्रत्येकी दोन गडी बाद केले. जयंत यादवने एक बळी मिळविला.
संक्षिप्त धावफलक : उत्तर विभाग प. डाव 58.3 षटकात सर्वबाद 198, दक्षिण विभाग प. डाव 54.4 षटकात सर्वबाद 195, उत्तर विभाग दु. डाव 56.4 षटकात सर्वबाद 211 (शोरे 5, प्रशांत चोप्रा 19, कालसी 29, प्रभसिमरन सिंग 63, अंकितकुमार 26, निशांत सिंधू 15, हर्षित राणा 38, विजयकुमार विशाख 5-76, साई किशोर 3-28, कविरप्पा 2-47), दक्षिण विभाग दु. डाव 36.1 षटकात 8 बाद 219 (मयांक अगरवाल 54, हनुमा विहारी 43, रिकी भुई 34, तिलक वर्मा 25, हर्षित राणा 3-84, बालतेज सिंग, अरोरा प्रत्येकी दोन बळी, जयंत यादव एक बळी).
