दलित समाजाच्या समस्यांचे निराकरण करा

बेळगाव : दलित समाजातील विविध समस्या जाणून घेण्यासाठी मंगळवारी पोलीस आयुक्तांनी दलित नेत्यांच्या बैठकीचे आयोजन केले होते. पोलीस आयुक्तालयात पार पडलेल्या बैठकीत उपस्थितांनी आपल्या तक्रारी व मत पोलीस अधिकाऱ्यांसमोर व्यक्त केले. सुरुवातीला दलित बांधवांच्या समस्या पोलीस आयुक्त भूषण बोरसे, कायदा व सुव्यवस्था विभागाचे पोलीस उपायुक्त नारायण बरमणी व उपस्थित अधिकाऱ्यांनी ऐकून घेतल्या. ‘पोलीस आपल्या दारी’ यशस्वीरित्या राबविण्यासह दर महिन्याला पोलीस स्थानक न्याय दलित समाजाच्या बैठका आयोजित कराव्यात, तर दर तीन महिन्यातून एकदा पोलीस आयुक्तालयाच्यावतीने बैठकीचे आयोजन करण्यात यावे, समाजाच्या विविध समस्या जाणून घेऊन त्या सोडविण्यासाठी प्रयत्न केले पाहिजे. ग्रामीण भागातील काही गावांमध्ये अद्याप बीट पोलीस व्यवस्थितरित्या होत नाही. त्यामुळे बीट पोलिसांना गावोगावी पाठविण्यात यावे, पोलीस स्थानकात तक्रारी घेऊन आलेल्यांच्या तक्रारींचे निराकरण तातडीने करावे, अशा विविध मागण्या यावेळी करण्यात आल्या. बैठकीला दलित नेते मल्लेश चौगुले, मल्लेश कुरंगी, कऱ्याप्पा गुंडण्णावर, महादेव तळवार, रवी बस्तवाडकर यांच्यासह दलित नेते व पदाधिकारी उपस्थित होते.