समस्या त्वरित सोडवा; मंत्री हेब्बाळकर यांची सूचना

हिंडलगा : हिंडलगा कारागृहातील जॅमरमुळे या भागातील मोबाईल सेवा, इंटरनेट सेवा ठप्प झाल्याने विद्यार्थी व जनतेला नाहक त्रास सहन करावा लागत आहे. याची दखल लागलीच कर्नाटक युवा काँग्रेसचे पदाधिकारी मृणाल हेब्बाळकर यांनी घेऊन कारागृह अधीक्षक व्ही. कृष्णमूर्ती यांची भेटून निवेदन सादर केले. तसेच महिला व बालकल्याण मंत्री लक्ष्मी हेब्बाळकर यांनी बेंगळूरहून दूरध्वनीद्वारे संपर्क साधून ही समस्या त्वरित सोडविण्याची सूचना केली आहे. यावेळी हे निवेदन ग्राम पंचायत अध्यक्ष मीनाक्षी हित्तलमनी, मृणाल हेब्बाळकर, सदस्य प्रवीण पाटील, गजानन बांदेकर, राहुल उरणकर, अशोक कांबळे, प्रेरणा मिरजकर, रेणुका भातकांडे, सीमा देवकर यांच्यामार्फत अधीक्षक व्ही. कृष्णमूर्ती यांना देण्यात आले.