गाजली हलद हे गीत प्रत्येकाला आपलेसे वाटेल असे गीत : अभिनेते विजय पाटकर
तळेरे: प्रतिनिधी
एकाच गीतात फुल पॅकेज पहायला मिळेल असे सुंदर गाजली हलद हे गीत झाले आहे. कोकणातील दशावतार ही लोककला, सुंदर लोकसंगीताचा वापर, कोकणचे वैशिष्टपूर्ण सौंदर्य आणि प्रचंड ऊर्जा असलेली सर्व तरुण कलाकार मंडळी अशी वेगळी खासियत असलेले गीत पाहून प्रत्येकाला आपलेसे वाटेल असे सुंदर गीत झाले असल्याचे प्रतिपादन ज्येष्ठ अभिनेते विजय पाटकर यांनी केले.
कणकवली तालुक्यातील शिडवणे येथील संगीतकार, गीतकार आणि दिग्दर्शक प्रणय शेट्ये यांच्या बहुचर्चित आणि वेगळा प्रयोग असलेल्या “गाजली हलद” या गीताचा लोकार्पण सोहळा मुंबई येथील बॉस स्टुडिओमध्ये ज्येष्ठ अभिनेते विजय पाटकर आणि सुप्रसिध्द पार्श्वगायक डॉ. उत्कर्ष शिंदे यांच्या हस्ते करण्यात आले. या कार्यक्रमाचा शुभारंभ विजय पाटकर यांच्या हस्ते दीपप्रज्वलनाने करण्यात आला. यावेळी बॉस स्टुडिओचे पंकज शाह, संगीतकार, गीतकार, दिग्दर्शक प्रणय शेट्ये, पार्श्वगायिका कांचन किरण मिश्रा, दिग्दर्शक सिद्धार्थ श्रीवास्तव, समाजसेवक संतोष कासले यांच्यासह संपूर्ण द्रौपदी टीम उपस्थित होती.
