बेळगाव पोलीस आयुक्तपदी सिद्धरामप्पा यांची वर्णी

बेळगाव : बेळगावच्या पोलीस आयुक्तपदी एस. एन. सिद्धरामप्पा यांची बुधवारी नियुक्ती करण्यात आली आहे. डॉ. एम. बी. बोरलिंगय्या यांच्या बदलीनंतर 22 दिवसांनी बेळगावला कायमचे पोलीस आयुक्त लाभले आहेत. सिद्धरामप्पा हे पोलीस महानिरीक्षक दर्जाचे अधिकारी असून 2005 बॅचचे आयपीएस अधिकारी आहेत. सध्या बेंगळूर येथील पोलीस मुख्यालयात पोलीस महानिरीक्षक म्हणून ते सेवा बजावत होते. बेळगाव पोलीस आयुक्तपदी त्यांची नियुक्ती करण्यात आली असून यासाठी आयुक्तपदाचा दर्जा वाढविण्यात आला आहे. 20 जून रोजी पोलीस आयुक्त डॉ. एम. बी. बोरलिंगय्या यांची म्हैसूरला बदली झाली होती. तेव्हापासून हे पद रिक्त होते. दि. 28 जून रोजी बेळगाव उत्तर विभागाचे पोलीस महानिरीक्षक विकाशकुमार विकाश यांच्याकडे आयुक्तपदाचा अतिरिक्त भार सोपविण्यात आला होता. त्याचदिवशी त्यांनी उत्तर विभागाच्या पोलीस महानिरीक्षकपदाचा पदभारही स्वीकारला होता. हिरेकोडी (ता. चिकोडी) येथील जैन मुनींच्या हत्येनंतर गृहमंत्री डॉ. जी. परमेश्वर हे सोमवार दि. 10 जुलै रोजी बेळगाव दौऱ्यावर आले होते. त्यावेळी पत्रकारांनी पोलीस आयुक्तांची नियुक्ती कधी? असा प्रश्न विचारला होता. लवकरच बेळगावसाठी पोलीस आयुक्तांची नियुक्ती होईल, अशी ग्वाही त्यांनी दिली होती. बुधवारी राज्यातील चार आयपीएस अधिकाऱ्यांच्या बदल्या झाल्या असून एस. एन. सिद्धरामप्पा या ज्येष्ठ आयपीएस अधिकाऱ्याची पोलीस आयुक्तपदी नियुक्ती करण्यात आली आहे.