श्वेता तिवारी या अभिनेत्रीने ‘कसौटी जिंदगी के’ या मालिकेत प्रेरणा ही भूमिका साकारून घराघरात स्वत:ची ओळख निर्माण केली होती. तसेच श्वेताने बिग बॉस या रियलिटी शोचे विजेतेपद मिळविले होते. पलक तिवारी या अभिनेत्रीची आई असलेल्या श्वेताने याचबरोबर खतरों के खिलाडी या रियलिटी शोमध्ये भाग घेतला होता. टीव्हीच्या जगतातील ही अभिनेत्री आता चित्रपटात दिसून येणार आहे.
श्वेता तिवारीने सोशल मीडियावर रोहित शेट्टीसोबतचे छायाचित्र शेअर केले आहे. याद्वारे तिने रोहित शेट्टीचा आगामी चित्रपट ‘सिंघम अगेन’मधून झळकणार असल्याची माहिती चाहत्यांना दिली आहे. हा चित्रपट श्वेतासाठी मोठी संधी ठरणार आहे, कारण यात अजय देवगण आणि रणवीर सिंह यासारखे कलाकार दिसून येणार आहेत.
या चित्रपटाचे चित्रिकरण सुरू झाले आहे. मुंबईतील एका स्टुडिओत 16 सप्टेंबर रोजी याचे चित्रिकरण प्रमुख कलाकारांच्या उपस्थितीत सुरू करण्यात आले आहे. हा चित्रपट पुढील वर्षी स्वातंत्र्य दिनी प्रदर्शित होणार आहे. त्याच दिवशी अल्लू अर्जुनचा पुष्पा 2 हा चित्रपट देखील प्रदर्शित होणार आहे. श्वेता तिवारी ही टीव्ही क्षेत्रातील दिग्गज अभिनेत्री आहे. तसेच सोशल मीडियावर तिचा मोठा चाहतावर्ग आहे. तर सिंघम अगेन या चित्रपटात अर्जुन कपूर हा अभिनेता देखील दिसून येणार असल्याचे समजते.
