शुभम शेळके यांना जामीन मंजूर

बेळगाव : बाळेकुंद्रीनजीक केएसआरटीसी बसवाहकावर सहप्रवाशांनी हल्ला केल्यानंतर या प्रकरणाला भाषिक रंग देण्याचा प्रयत्न झाला. त्यामुळे समितीचे युवानेते शुभम शेळके यांनी सोशल मीडियाच्या माध्यमातून प्रतिक्रिया व्यक्त केली होती. मात्र माळमारुती पोलिसांनी शेळके यांच्याविरोधात सुमोटो गुन्हा दाखल केला होता. याप्रकरणी शनिवारी शुभम शेळके आपल्या वकिलांसह न्यायालयात हजर झाले. त्यावेळी न्यायालयाने जामीन मंजूर केला. तिकिटावरून कंडक्टर आणि सहप्रवाशांमध्ये झालेल्या वादावरून कंडक्टरला मारहाण झाल्याचा आरोप केला होता. मात्र आपल्याला मराठी येत नसल्याचे सांगितल्याने मारहाण झाल्याचे कंडक्टरने सांगितल्याने या प्रकरणाला कानडी संघटनांनी भाषिक रंग देऊन बेळगावला वेठीस धरण्याचा प्रयत्न केला. त्यामुळे समितीचे युवानेते शुभम शेळके यांनी सोशल मीडियाच्या माध्यमातून प्रतिक्रिया व्यक्त केली होती. मात्र त्यांनी कानडी संघटनांविरोधात आक्षेपार्ह शब्द वापरल्याचा ठपका ठेवत माळमारुती पोलिसांनी त्यांच्यावर गुन्हा दाखल केला होता. शनिवारी शुभम शेळके आपल्या वकिलांसह न्यायालयात हजर झाल्याने द्वितीय जेएमएफसी न्यायालयाच्या न्यायाधीश पंकजा हुन्नूर यांनी त्यांना जामीन मंजूर केला. शेळके यांच्यावतीने अॅड. महेश बिर्जे, अॅड. वैभव कुट्रे, अॅड. बाळासाहेब कागणकर, अॅड. एम. बी. बोंद्रे यांनी काम पाहिले.