कर्नाटकच्या एसटी बसवर फडकवला भगवा ध्वज
कोल्हापूर
कोल्हापुरात शिवसेना उद्धव बाळासाहेब ठाकरे पक्ष आक्रमक झाला आहे. काल कर्नाटकातील चित्रदुर्ग येथे कन्नड संघटनांनी महाराष्ट्र राज्य परिवहन महामंडळाच्या बस चालकाला काळ फासून मारहाण केल्याची घटना घडली होती. याचाच निषेध नोंदवण्यासाठी शिवसेनेचे ठाकरे गटाचे सहसंपर्क प्रमुख विजय देवणे यांच्या नेतृत्वाखाली कोल्हापूरच्या मध्यवर्ती बस स्थानकाबाहेर कन्नड संघटनांनी केलेल्या या कृत्याच्या निषेधार्थ जोरदार घोषणाबाजी करत परिसर दणाणून सोडला. कोल्हापूरच्या मध्यवर्ती बस स्थानकातून कर्नाटक मध्ये जाणारी वाहतूक यावेळी रोखून धरली. तर आक्रमक झालेल्या शिवसैनिकांनी कर्नाटक सरकारला सज्ज इशारा, देत कर्नाटकच्या बस वर भगवा ध्वज फडकवला.
“कर्नाटकात चित्रदूर्ग येथे एस टी चालकाच्या तोंडाला काळ फासलं. हा नामर्दपणा कन्नड वेदीका संघटनेने केलेला आहे. आज महाराष्ट्रातही कर्नाटकच्या बस येत असतात. महाराष्ट्राच्या मुख्यमंत्र्यांकडे आमची मागणी आहे, की त्यांनी कर्नाटकच्या बसेसवर महाराष्ट्रात बंदी घालावी. कर्नाटक सरकार मराठी माणसाची जोपर्यंत माफी मागत नाही, तोपर्यंत आमचे हे आंदोलन सुरूच राहणार आहे. कन्नड वेदीका संघटनेने बस चालकाच्या तोंडाला काळं फासलं, पण छत्रपती शिवाजी महाराजांचं आणि स्वराज्याचं प्रतिक असताना, मराठी माणसाची अस्मिता असताना भगवा झेंडा कर्नाटकच्या बसवर लावला आहे.”
-विजय देवणे, सह संपर्कप्रमुख, शिवसेना (उबाठा)
