यंदा जपानमध्ये शिवजयंतीची जय्यत तयारी सुरू!
इचलकरंजी
जपानमध्ये यंदा शिवजयंतीच्या भव्य तयारीने जोर धरला आहे. छत्रपती शिवाजी महाराजांच्या पराक्रमाला आदरांजली वाहण्यासाठी जपानमधील भारत कल्चरल सोसायटी (बी.सी.एस.) ने अनोखी संकल्पना साकारली आहे. प्रतापगडावर विधिवत पूजन केलेली शिवज्योत यंदा थेट जपानच्या भूमीत पोहोचणार आहे. सत्तर वर्षांनंतर प्रथमच जपानमध्ये शिवजयंती साजरी झाल्यानंतर, यंदाही शिवजयंती उत्सवात भव्य पालखीतून महाराजांच्या मूर्तीची मिरवणूक, लेझीम, ढोल-ताशा, फेट्यांचा थाट, शिवचरित्रावर आधारित महानाट्या सादर करण्यात येणार आहे.
यंदा जपानमधील शिवजयंतीचे वैशिष्ट्या ठरणार आहे ती प्रतापगडावरून जपानला नेली जाणारी शिवज्योत. महाराष्ट्रात जशी शिवजयंती गडांवरून मशालीच्या प्रकाशात साजरी केली जाते. तीच परंपरा पाळत भारत कल्चरल सोसायटीने प्रतापगडावर विधिवत पूजा करून ही मशाल जपानला नेण्याचे नियोजन केले आहे. यासाठी संस्थेचे कार्यकर्ते अनिकेत पाटील यांच्यासोबत बळवंत पाटील, महेश मोरे आणि स्थानिक सदस्यांनी प्रतापगडला भेट दिली.
यावेळी कोल्हापुरातील पाचगाव येथील क्रांतिवीर फिरंगोजी शिंदे मर्दानी आखाड्याचे वस्ताद प्रमोद पाटील, त्यांच्या सहकाऱ्यांनी शिवकालीन मर्दानी खेळांचे प्रात्यक्षिक करून विशेष सहकार्य केले. जपानमधील शिवजयंती उत्सवाला भारताचे जपानमधील राजदूत सी. बी. जॉर्ज प्रमुख पाहुणे म्हणून उपस्थित राहणार आहेत. तसेच टोकियोमधील स्थानिक महापौर, जपानमधील विविध भारतीय, जपानी संस्थांचे प्रतिनिधी, सुमारे 200 हून अधिक जपानी नागरिक यावेळी उपस्थित राहणार आहेत.
महानाट्याचे सादरीकरण
सुमारे शंभरांहून अधिक कार्यकर्त्यांची मेहनत आणि तितक्याच स्थानिक कलाकारांच्या योगदानातून ‘शिवचरित्र’ महानाट्यातून शिवरायांचा पराक्रम आणि इतिहास साकारला जाणार आहे. त्यामुळे यंदाचा शिवजयंती महोत्सव अधिक भव्यदिव्य होणार आहे.
संस्थेचे सामाजिक कार्य:
भारत कल्चरल सोसायटी (बी.सी.एस.)ही जपानमधील सेवाभावी संस्था आहे. ती विविध उपक्रमांद्वारे भारतीय आणि जपानी संस्कृतींमध्ये सेतू बांधण्याचे काम करते. रक्तदान शिबिरे, स्वच्छता मोहिमा आणि सामाजिक गरजांसाठी स्वयंसेवक पुरवणे ही त्यांची काही वैशिष्ट्यापूर्ण कामे आहेत. छत्रपती शिवाजी महाराजांच्या तेजस्वी पराक्रमाचा उजाळा देण्यासाठी, त्यांचा इतिहास नव्या पिढीपर्यंत पोहोचवण्यासाठी जपानमधील हा शिवजयंती सोहळा एक प्रेरणादायक घटना ठरेल!
