शिवजयंती चित्ररथ मिरवणूक डीजेमुक्त मंडळांचे पदाधिकारी – पोलिसांमध्ये चर्चा

बेळगाव : शिवजयंती चित्ररथ मिरवणूक शनिवार दि. 27 रोजी होणार आहे. मिरवणुकीत कोणीही डीजे लावणार नाही, असा निर्धार मंडळांच्या कार्यकर्त्यांनी बैठकीत केला. पोलीस प्रशासनानेही डीजेऐवजी पारंपरिक वाद्यांचा वापर करावा, असे आवाहन केले. सोमवारी सायंकाळी मार्केट पोलीस स्थानकात शिवजयंती उत्सव मंडळांच्या पदाधिकाऱ्यांसोबत झालेल्या बैठकीत चर्चा करण्यात आली. बेळगाव शहरामध्ये भव्य प्रमाणात शिवजयंती चित्ररथ मिरवणूक निघते. 70 ते 75 चित्ररथांचा यामध्ये समावेश असतो. त्यामुळे हा उत्सव सुरळीतपद्धतीने पार पडावा, या उद्देशाने पोलीस प्रशासनाने आतापासूनच पूर्वतयारी करण्यास सुरुवात केली आहे. चित्ररथ मिरवणुकीत डीजेऐवजी शिवचरित्र व प्रबोधनात्मक देखावे सादर करण्यासंदर्भात चर्चा करण्यात आली. मंडळांनी परवानगी घेताना या नियमांची अंमलबजावणी करावी, असे आवाहन पोलीस प्रशासनाने केले. चित्ररथ मिरवणूक शांततेत व वेळेत पूर्ण व्हावी यासाठी सर्व सहकार्य करू, असे आश्वासन मंडळाच्या पदाधिकाऱ्यांनी दिले. यावेळी सुनील जाधव, विनायक बावडेकर, नगरसेवक राजू भातकांडे, नगरसेवक शिवाजी मंडोळकर, रोहन जाधव, अनंत बामणे, मेघन लंगरकांडे, विजय जाधव, अरुण पाटील यांसह इतर उपस्थित होते.