शेफर्ड, लिव्हिंगस्टोन आरसीबी संघात दाखल

नवी दिल्ली : विंडीजचा अष्टपैलू रोमारिओ शेफर्ड व इंग्लंडचा लियाम लिव्हिंगस्टोन हे भारतात परतले असून ते आरसीबी संघात दाखल झाले आहेत, असे एका क्रीडा वृत्त वाहिनीने म्हटले आहे. भारत-पाक यांच्यातील संघर्षामुळे बीसीसीआयने 8 मे रोजी आयपीएल स्पर्धा तहकूब केली होती. पण दोन्ही देशात संघर्षविराम झाल्यानंतर आयपीएल 17 मेपासून पुन्हा करण्यात येणार आहे. 17 रोजी आरसीबी व विद्यमान विजेते कोलकाता नाईट रायडर्स यांच्यात बेंगळूरमध्ये सामना होणार आहे. शेफर्डसोबत आंद्रे रसेल, सुनील नरेन व केकेआरचा मेन्टर ड्वेन ब्रॅव्हा हेदेखील दाखल झाले आहेत. विंडीज संघ इंग्लंड दौऱ्यावर जाणार असून 29 मेपासून त्यांची वनडे मालिका सुरू होणार आहे आणि शेफर्ड हा त्या संघाचा सदस्य आहे. 29 मे नंतर तो आयपीएलमध्ये खेळणार आहे का, याबाबत विंडीज मंडळाने अद्याप काहीही स्पष्ट केलेले नाही.