Sharad Pawar News : नव्या संसद भवनाचे भूमिपूजन करतानाही कोणाला विश्वासात घेतलं नाही.आता इमारत तयार झाली आहे. असा महत्वाचा निर्णय घेताना संसदेच्या सदस्यांना विश्वासात घेण्याची गरज होती असं वक्तव्य राष्ट्रवादी काँग्रेसचे अध्यक्ष शरद पवार यांनी केलं. आज त्यांनी प्रसारमाध्यमांशी संवाद साधला. नव्या संसद भवनाच्या उद्घाटन सोहळ्यावरून गेले अनेक दिवस वाद सुरु आहे. यावरून मोदी सरकारवर शरद पवार यांनी निशाणा साधला.
यावेळी बोलताना ते म्हणाले की, राष्ट्रपती द्रौपदी मुर्मूंना संसदेच्या उद्घाटन सोहळ्याला निमंत्रण नसल्याने विरोधी पक्षातील काही ज्येष्ठ सहकाऱ्यांनी आपण संसदेच्या उद्घाटनाला जाऊ नये अशी भूमिका मांडली. त्या भूमिकेला माझा पाठिंबा आहे.संसदेची सुरूवात राष्ट्रपतींच्या उपस्थितीने होते. पण, राष्ट्रपतींनी संसदेचं उद्घाटन करावं, हे सुद्धा मान्य करण्यात आलं नाही. त्यामुळे कोणाला विश्वासात न घेताच सर्व निर्णय घ्यायचे असतील तर का जायचं असा सवालही त्यांनी केला.
