पुणे / वार्ताहर :
नोकरी लावण्याच्या आमिषाने 44 जणांकडून तब्बल 4 कोटी 85 लाख उकळल्याच्या आरोपावरून अटक करण्यात आलेल्या राज्य परीक्षा परिषदेच्या माजी आयुक्त शैलेजा रामचंद्र दराडे (रा. रेव्हेरायीन ग्रीन्स, पाषाण, सुसरोड) यांना पुणे लष्कर न्यायालयाने 12 ऑगस्टपर्यंत पोलीस कोठडी सुनावली.
दरम्यान, यापूर्वी या प्रकारात त्यांचा भाऊ दादासाहेब रामचंद्र दराडे (रा. अकोले, ता. इंदापूर) याला चार एप्रिल रोजी अटक करण्यात आली होती. तो कारागृहात आहे. दोघांवर हडपसर पोलीस ठाण्यात संगणमत करून फसवणूक व अपहार केल्याचा गुन्हा दाखल आहे. याप्रकरणी पोपट सुखदेव सुर्यवंशी (50, रा. मु. पो. खानजोडवाडी, ता. आटपाडी, जि. सांगली) यांनी फिर्याद दिली आहे.
पोलिसांनी दिलेल्या माहितीनुसार, फिर्यादी यांच्या दोन नातेवाईक महिलांना शिक्षक या पदावर नोकरी लावतो, असे सांगून त्यांच्याकडून प्रत्येकी 12 लाख व 15 लाख रुपये असे 27 लाख रुपये घेतले. पैसे घेऊन वारंवार पाठपुरावा करून देखील त्यांना आजपर्यंत शिक्षक पदावर नोकरी लावली नाही. तसेच त्यांनी वारंवार मागणी करुन त्यांचे पैसे परत केले नाही. अशाच प्रकारे 44 जणांचा विश्वास संपादन करुन त्यांची लाखो रुपयांची फसवणूक केल्याचा आरोप आहे. याबाबत पोलिसांनी दोघांवरही गुन्हा दाखल केला होता. चौकशीअंती दराडे यांना हडपसर पोलिसांनी अटक केली. त्यांना सोमवारी दुपारी पुणे येथील लष्कर न्यायालयात हजर करण्यात आले. यावेळी सरकारी वकील अंजला नवगिरे यांनी दराडे यांच्या पोलिस कोठडीची मागणी केली. दाखल गुन्हा गंभीर स्वरूपाचा आहे, 2019 साली दराडे प्रशासकीय अधिकारी म्हणून काम पाहत असताना त्यांनी पदाचा गैरवापर करून नोकरीस लवण्याचे आश्वासन देऊन कोटय़वधींचा अपहार केल्याचे यावेळी नवगिरे युक्तीवाद करताना सांगितले.
शैलजा दराडे आणि त्यांचा भाऊ दादासाहेब दराडे यांनी एकुण 44 लोकांची फसवणूक केली आहे. काही लोकांना टीईटी पास करणे, शिक्षक पदावर, आरटीओ, तसेच तलाठी पदावर नोकरी लावतो सांगून मोठय़ा रकमा स्विकारल्या आहेत. गुन्हा दाखल झाल्यापासून त्या फरार झाल्या होत्या, त्यांना फरार होण्यास कोणी मदत केली? त्यांनी रकमेची कोठे विल्हेवाट लावली? त्यातून त्यांनी वस्तु, जागा, सोने खरेदी केले आहे का, याचा तपास करायचा आहे. त्यांचा आणखी एक साथीदार गुन्ह्यात निष्पन्न झाला असून त्याला देखील अटक करायची आहे. या गुन्ह्यात दराडे यांचा मुख्य सहभाग असून त्यांच्याकडून आणखी गुन्हे उघडकीस येण्याची शक्यता पाहता त्यांना पोलीस कोठडी देण्याची मागणी नवगिरे यांनी केली.
