अयोध्यानगरमध्ये सांडपाणी रस्त्यावर

बेळगाव ; अयोध्यानगर येथे ड्रेनेज व्हॉल्वमधून सांडपाणी ओव्हरफ्लो होऊन रस्त्यावरून वाहत आहे. मुख्य रस्त्यावरून सांडपाणी वाहत असल्याने परिसरात दुर्गंधी पसरली आहे. याचबरोबर ये-जा करणाऱ्या वाहनांमुळे सांडपाणी इतरांच्या अंगावर उडत असल्याने या चेंबरची स्वच्छता करावी, अशी मागणी रहिवाशांकडून मनपा प्रशासनाकडे करण्यात आली. आरटीओ सर्कलपासून कोल्हापूर सर्कलकडे जाणाऱ्या मुख्य रस्त्यावर अयोध्यानगरनजीक रस्त्यामधून ड्रेनेजचे सांडपाणी वाहत आहे. चेंबरची व्यवस्थित स्वच्छता न झाल्यामुळे कचरा अडकून पाणी ओव्हरफ्लो होऊन बाहेर पडत असल्याची शक्यता स्थानिक वर्तवित आहेत. सांडपाण्यामुळे परिसरात दुर्गंधी पसरली असून रोगराई पसरण्याची शक्यता असल्याने तात्काळ दुरुस्तीची मागणी करण्यात येत आहे. अयोध्यानगर येथील स्थानिक रहिवाशांनी महानगरपालिकेच्या अधिकाऱ्यांना या ड्रेनेज ओव्हरफ्लोची माहिती देत दुरुस्तीची मागणी केली आहे. परंतु सर्वच अधिकारी निवडणूक कामामध्ये गुंतल्याने सर्वसामान्यांच्या समस्यांकडे कोण लक्ष देणार? असा प्रश्न उपस्थित होत आहे.