न्यायालयासमोरील रस्त्यावर सांडपाणी

बेळगाव : जिल्हा न्यायालयासमोरील ड्रेनेजचे सांडपाणी रस्त्यावर आल्याने रस्त्यावरून ये-जा करणाऱ्या वाहन चालकांना याचा त्रास सहन करावा लागत आहे. ड्रेनेजची त्वरित दुरुस्ती करून समस्या निकालात काढण्याची मागणी नागरिकांतून केली जात आहे. न्यायालय परिसरात नागरिकांची मोठी वर्दळ असते. येथेच जिल्हाधिकारी कार्यालय, एस. बी. आय बँक असल्याने न्यायालयीन कामासह सरकारी कामांसाठी येणाऱ्या नागरिकांची कायम गर्दी असते. तर शहरातील रहदारीचा महत्त्वाचा रस्ता असल्याने वाहनांचीही सारखी वर्दळ असते. न्यायालयासमोरील ड्रेनेजमध्ये कचरा साचल्याने ड्रेनेजचे पाणी रस्त्यावर येत आहे. यातच वाहनांच्या वर्दळीमुळे ड्रेनेजचे पाणी नागरिकांच्या अंगावर उडत आहे. त्यामुळे नागरिकांना याचा त्रास सहन करावा लागत आहे. मनपाने याकडे त्वरित लक्ष देऊन ड्रेनेजची दुरुस्ती करावी, अशी मागणी केली जात आहे.