पुणे / प्रतिनिधी :
पुणे शहरातील बुधवार पेठेत बेकायदा वास्तव्य करणाऱ्या पाच बांग्लादेशी महिलांसह सात जणांना गुन्हे शाखेच्या सामाजिक सुरक्षा विभागाने पकडले. पोलिसांच्या पथकाने एका कुंटणखान्यावर छापा टाकून अल्पवयीन बांग्लादेशी मुलींना ताब्यात घेतले. आठवडाभरापूर्वी पोलिसांनी बुधवार पेठेतील वेश्यावस्तीतून बांग्लादेशी महिलांसह 19 जणांनी पकडले होते. त्यानंतर पुन्हा अशाच प्रकारची कारवाई करण्यात आली.
बुधवार पेठेतील वेश्यावस्तीत बांग्लादेशी महिला, त्यांचे साथीदार बेकायदा वास्तव्य करत असल्याची माहिती गुन्हे शाखेच्या सामाजिक सुरक्षा विभागाला मिळाली होती. पोलिसांच्या पथकाने छापा टाकून पाच बांग्लादेशी महिलांसह सात जणांना ताब्यात घेतले. चौकशीत एका कुंटणखान्यात बांग्लादेशी अल्पवयीन मुलीकडून वेश्याव्यवसाय करुन घेतला जात असल्याची माहिती मिळाली. पोलिसांच्या पथकाने अल्पवयीन मुलींची कुंटणखान्यातून सुटका केली. बांग्लादेशी महिला आणि नागरिकांकडे चौकशी करण्यात आली असता त्यांच्याकडे वास्तव्याची कोणतीही कागदपत्रे नसल्याचे उघडकीस आले.
ताब्यात घेण्यात आलेल्या 5 बांग्लादेशी महिला या वेश्या व्यवसाय करत होत्या. तर त्यांच्या सोबत असणारे पुरुष हे वेगवेगळे व्यवसाय करत होते. बेकायदा वास्तव्य केल्याप्रकरणी सात बांग्लादेशी नागरिकांविरुद्ध पोलिसांनी पारपत्र अधिनियम, तसेच परकीय नागरिक आदेश कायद्यातील कलमांन्वये फरासखाना पोलीस ठाण्यात गुन्हा दाखल केला. अल्पवयीन मुलीला वेश्याव्यवसायास प्रवृत्त केल्याप्रकरणी तीन दलालांविरुद्ध बाल लैंगिक अत्याचार प्रतिबंधक कायद्यान्वये (पोक्सो) स्वतंत्र गुन्हा दाखल करण्यात आला आहे.
