पालनाडू
आंध्रप्रदेशातील पालनाडू जिह्यातील रेंटाचिंतला येथे रविवारी मध्यरात्रीनंतर एक भीषण रस्ते अपघात झाला. या अपघातात 7 जणांचा मृत्यू झाला, तर 11 हून अधिक जण जखमी झाले. भरधाव वेगात असलेल्या मिनीबसने रस्त्याकडेला उभ्या असलेल्या एका मालवाहू लॉरीला धडक दिल्याने ही दुर्घटना घडल्याची माहिती पोलीस सूत्रांनी दिली. या धडकेत 6 जणांचा जागीच मृत्यू झाला, तर एकाचा रुग्णालयात मृत्यू झाला. मिनीबसमध्ये 38 जण बसले होते. तीर्थयात्रा करून श्रीशैलमला परतत असताना हा अपघात झाला. भरधाव वेगामुळे हा अपघात झाल्याची माहिती पोलीस सूत्रांनी प्राथमिक निष्कर्षाअंती दिली. बसचालकाविरोधात याप्रकरणी गुन्हा दाखल करण्यात आला आहे.
