सेन्सेक्स 320 अंकांनी मजबूत : निफ्टी 89 अंकांनी तेजीत : वाहन क्षेत्रात चमक
वृत्तसंस्था/ मुंबई
चालू आठवड्यातील अंतिम सत्रात शुक्रवारी भारतीय भांडवली बाजारात सेन्सेक्स 67, 800 च्या टप्प्यावर पोहोचला आहे. यासोबतच निफ्टीमध्येही तेजीची चमक कायम राहिल्याचे दिसून आले आहे. यावेळी बीएसई सेन्सेक्स 319 अंकांनी मजबूत राहिला आहे. याचदरम्यान निफ्टीनेही 89 अंकांची तेजी प्राप्त केली होती. मुख्य कंपन्यांमध्ये बजाज ऑटेचे समभाग हे सहा टक्क्यांनी वधारले आहेत. याचदरम्यान टाटा मोर्ट्स आणि महिंद्रा अॅण्ड महिंद्रा यांचे समभाग हे दोन टक्क्यांनी मजबूत झाले आहेत.
दिग्गज कंपन्यांच्या मदतीने शुक्रवारी भारतीय बाजारात दिवसअखेर बीएसई सेन्सेक्स 319.63 अंकांनी मजबूत होत निर्देशांक 67,838.63 वर बंद झाला आहे. दुसऱ्या बाजूला राष्ट्रीय शेअर बाजाराचा निफ्टी दिवसअखेर 89.25 अंकांच्या तेजीसह निर्देशांक 20,192.35 वर बंद झाला.
विविध क्षेत्रांच्या कामगिरीसोबत शुक्रवारी बाजारात काहीसा मिळता जुळता कल राहिला होता. यामध्ये एफएमसीजी, ऑईल अॅण्ड गॅस , पॉवर आणि रियल्टी यांचे निर्देशांक 0.2 ते 1 टक्क्यांनी प्रभावीत झाले आहेत. तसेच वाहन , बँक, औषध आणि आयटी यांचे निर्देशांक हे 0.3 ते 1 टक्क्यांनी मजबूत राहिल्याचे नोंद केले आहे.
बीएसई सेन्सेक्समध्ये महिंद्रा अॅण्ड महिंद्रा यांचे समभाग हे 2.17 टक्क्यांनी वधारले आहेत. याच दरम्यान भारती एअरटेल, टाटा मोर्ट्स, टेक महिंद्रा आणि एचसीएल टेक यांचे समभाग हे एक टक्यांनी तेजीत राहिले आहेत. यासह टीसीएस, एचडीएफसी ब्ँाक, विप्रो, सनफार्मा, मारुती सुझुकी, आयसीआयसीआय बँक, अल्ट्राटेक सिमेंट, रिलायन्स इंडस्ट्रीज, इन्फोसिस, टाटा स्टील, जेएसडब्लू स्टील आणि स्टेट बँक यांचे समभाग वधारले आहेत.
अन्य कंपन्यांमध्ये एशियन पेन्ट्स, हिंदुस्थान युनिलिव्हर, बजाज फिनसर्व्ह, एनटीपीसी, आयटीसी, इंडसइंड बँक, कोटक महिंद्रा बँक, टायटन आणि लार्सन अॅण्ड टुब्रो यांचे समभाग प्रभावीत झाले आहेत. अमेरिकन डॉलरच्या तुलनेत रुपया 15 पैशांनी प्रभावीत 83.18 च्या स्तरावर बंद झाला आहे. मागील सत्रात हा आकडा 83.03 वर बंद झाला आहे.
