सेन्सेक्स 79 अंकांनी तेजीत : जिओ फायनान्स 5 टक्क्यांनी मजबूत
वृत्तसंस्था/ मुंबई
भारतीय भांडवली बाजारात चालू आठवड्यातील दुसऱ्या दिवशी मंगळवारी बीएसई सेन्सेक्स व एनएसई निफ्टी यांचे निर्देशांक वधारुन बंद झाले आहेत. यावेळी जिओ फायनान्शिअलचे समभाग हे 5 टक्क्यांनी मजबूत राहिले. तर युपीएल व हिंडाल्को यांचे समभाग हे दोन टक्क्यांनी तेजीत राहिले.
प्रमुख कंपन्यांच्या कामगिरीसोबत दिवसअखेर सेन्सेक्स 79.22 अंकांच्या तेजीसोबत निर्देशांक 65,075.82 वर बंद झाला आहे. दुसऱ्या बाजूला राष्ट्रीय शेअर बाजाराचा निफ्टी हा 36.60 अंकांनी वधारुन निर्देशांक 0.19 टक्क्यांच्या मजबुतीसह निर्देशांक 19,342 वर बंद झाला. निफ्टीत जिओ फायनान्शिअलचे समभाग हे पाच टक्क्यांनी अप्पर सर्किटसोबत बंद झाले. तर युपीएल आणि हिंडाल्कोचे समभाग वधारले. निफ्टीत भारती एअरटेल व हिंदुस्थान युनिलिव्हर यांचे समभाग हे 1 टक्क्यांनी घसरणीत राहिले आहेत.
जिओ फायनान्शिअलचे समभाग सर्वाधिक 4.72 टक्क्यांनी वधारले आहेत. यासह टाटा स्टील 1.66 टक्के, तर टेक महिंद्रा, एनटीपीसी, जेएसडब्ल्यू स्टील, पॉवरग्रिड कॉर्प, अल्ट्राटेक सिमेंट आणि एचसीएल टेकचे समभाग हे 1 टक्क्यांपेक्षा अधिकने वधारले आहेत. याच दरम्यान टायटन, एचडीएफसी बँक, बजाज फायनान्स, एशियन पेन्ट्स, टाटा मोर्ट्स, लार्सन अॅण्ड टुब्रो, महिंद्रा अॅण्ड महिंद्रा, स्टेट बँक, बजाज फिनसर्व्ह आणि मारुती सुझुकी यांचे समभाग तेजीत राहिले.
अन्य कंपन्यांमध्ये भारती एअरटेल, हिंदुस्थान युनिलिव्हर, अॅक्सिस बँक, रिलायन्स इंडस्ट्रीज, इंडसइंड बँक, कोटक महिंद्रा बँक, सनफार्मा, आयसीआयसीआय बँक आणि आयटीसी यांचे समभाग हे नुकसानीत राहिले आहेत.
‘या’ क्षेत्रांची कामगिरी
विविध क्षेत्रांची स्थिती पाहिल्यास यामध्ये धातू, ऊर्जा आणि रियल इस्टेट या क्षेत्रांचे निर्देशांक एक एक टक्क्यांनी वधारले आहेत. तसेच पीएसयू बँक, एफएमसीजी आणि औषध या क्षेत्रांशी संबंधीत क्षेत्रांच्या निर्देशांकात विक्री झाल्याचे दिसून आले.
