पुणे / प्रतिनिधी :
घरी मुलींचा सांभाळ करणे अवघड झाल्याने आईवडिलांनी स्वत:च्या मुलीची भीक मागण्यासाठी दोन हजार रुपयांना विक्री केल्याचा आणि त्यांना जात पंचायतीच्या पंचानी साथ दिल्याचा धक्कादायक प्रकार उघडकीस आला आहे. याप्रकरणी मरीआई देववाले समाजातील दहा पंचासह पिडित मुलीच्या आईवडिलांवर येरवडा पोलीस ठाण्यात गुन्हा दाखल करण्यात आला आहे.
याप्रकरणी ऍड .शुभम शंकर लोखंडे (वय 26, रा. हडपसर, पुणे) यांनी पोलिसांकडे तक्रार दाखल केली आहे. त्यानुसार मुलीची आई निलाबाई अनिल पवार, वडील अनिल हिरा पवार (रा. मिराजगाव, ता. कर्जत, अहमदनगर) आणि जात पंचायतीचे पंच अनिल जाधव, लक्ष्मी अनिल जाधव, लक्ष्मण भगवान निंबाळकर, आण्णा बाळू पवार, रामा निंबाळकर, नारायण पवार, बाळू पवार, माऱ्या पवार, पंडया पवार, आण्णा निंबाळकर, शेटण्णा पवार, सोनिया पवार व ढेऱ्या पवार यांच्यावर याबाबत गुन्हा दाखल करण्यात आलेला आहे.
पोलिसांनी दिलेल्या माहितीनुसार, तक्रारदार हे वकील असून, त्यांच्या ओळखीच्या व्यक्तीने त्यांना याबाबतची कल्पना दिलेली होती. एक महिला मागील दोन महिन्यापासून कल्याणीनगर, विमाननगर परिसरात चार ते पाच वर्षाच्या एका मुलीला घेऊन भीक मागत असताना दिसून येत होती. पुरेशी भीक न मिळाल्यास ही महिला मुलीला मारहाण करत होती. याबाबत अधिक माहिती घेतली असता, अहमदनगरमधील एका दाम्पयाला सहा मुली आहेत. त्यांच्याकडून पुण्यातील दाम्पत्याने समाजातील पंचाच्या सहमतीने या मुलीला दोन हजार रुपयांना विकत घेतले. त्यासाठी जात पंचायतीने पैसे घेतल्याची माहिती मिळाली. समाजातील चारजणांनी त्या मुलीला विकत घेऊ नये, यासाठी विरोध केला. परंतु समाजातील दहा पंचांनी त्यांचे म्हणणे ऐकले नाही. तसेच याप्रकारला मान्यता दिली, विरोध करणाऱ्यांना जातीचे बाहेर काढून त्यांच्यावर बहिष्कार टाकला जाईल, असा दम जातपंचायतीने दिला. त्यामुळे याबाबतची माहिती तक्रारदार यांना मिळाल्यावर त्यांनी पोलिसांकडे यासंदर्भात धाव घेऊन तक्रार दाखल केली. त्यानंतर पोलिसांनी अनिल जाधव व लक्ष्मण जाधव या दोनजणांना अटक केलेली आहे.
