घटस्थापनेदिवशी महादेव मंदिरात नागाचे दर्शन

बेळगाव : नागाच्या मंदिरामध्येच चक्क खऱ्या खुऱ्या नागाचे दर्शन घडल्याची घटना नुकतीच बेळगाव शहरात घडली. त्यामुळे नागदेवाच्या दर्शनासाठी भाविकांनी गर्दी केली होती. सगळ्यांनी दर्शन घेतल्यानंतर एका सर्पमित्राला बोलावून अखेर त्या नागाला पकडण्यात आले. शुक्रवारपेठ, टिळकवाडी येथील नागझरी मंदिरामध्ये सोमवारी मंदिराच्या एका कोपऱ्यात नागाचे दर्शन झाले. एका दगडाखाली वेटोळे घालून बसलेला नाग निदर्शनास येताच याची माहिती मंदिर प्रशासनाला मिळाली. दोन-तीन तास महादेव मंदिरामध्ये नागदेवतेचे दर्शन नागरिकांना मिळाले. त्यामुळे दर्शनासाठी मोठ्या प्रमाणात गर्दी झाली होती. टिळकवाडी येथील नागझरी मंदिर हे 60-70 वर्षे जुने आहे. सोमवारी घटनेस्थापनेदिवशी अशा प्रकारे नागदेवतेने दर्शन दिल्याने याची चर्चा शहरात सर्वत्र पसरली. काही वेळानंतर अनगोळ येथील एका सर्पमित्राला बोलावून नागाला पकडण्यात आले. परंतु घडलेल्या या प्रकारामुळे टिळकवाडी परिसरात जोरदार चर्चा होती.