सौंदत्ती पोलिसांकडून दोघा घरफोड्यांना अटक

बेळगाव : चोऱ्या, घरफोड्यांप्रकरणी दोघा जणांना अटक करून सौंदत्ती पोलिसांनी 66 हजाराचा ऐवज जप्त केला आहे. अटक करण्यात आलेल्यांमध्ये सोलापूर येथील एकाचा समावेश आहे. रामदुर्गचे पोलीस उपअधीक्षक रामनगौडा हट्टी यांच्या मार्गदर्शनाखाली सौंदत्तीचे पोलीस निरीक्षक करुणेशगौडा जे., पोलीस उपनिरीक्षक आनंद क्यारकट्टी, गुन्हे तपास विभागाचे पोलीस उपनिरीक्षक के. एम. कल्लूर व त्यांच्या सहकाऱ्यांनी ही कारवाई केली आहे. रोहित राम कायगोंड ऊर्फ लहूराम वाघमोडे, मूळचा रा. गुरुदेवदत्तनगर सोलापूर, सध्या रा. गांधीनगर-विजयपूर, शंकर महादेवप्पा अब्बार, रा. शिंदोगी, ता. सौंदत्ती अशी अटक करण्यात आलेल्यांची नावे असून गुरुवार दि. 26 ऑक्टोबर रोजी ही कारवाई करण्यात आली आहे. त्यांच्याजवळून 10 ग्रॅम सोने, 10 हजार रुपये रोख रक्कम असा 66 हजार 800 रुपये किमतीचा ऐवज जप्त करण्यात आला आहे.