कारवारचे आमदार सतीश सैल यांचे उत्स्फूर्त स्वागत

काणकोण : नुकत्याच पार पडलेल्या कर्नाटक राज्यातील विधानसभा निवडणुकीत कारवार अंकोला मतदारसंघात काँग्रेंसच्या चिन्हावर विजयी झालेल्या सतीश सैल यांचे कारवार भागातील कार्यकर्त्यांनी उत्स्फूर्त असे स्वागत केले. श्री. सैल यांची संपूर्ण शहरात विजयी मिरवणूक काढण्यात आली. कारवार-अंकोला मतदारसंघातील सीबर्ड, कैगा प्रकल्प, आदित्य बिर्ला, त्याच प्रमाणे अन्य आस्थापनात काम करणाऱ्या संघटित तसेच असंघटित कामगाराच्या वेतनाचा, त्याच प्रमाणे रोजगाराच्या सुरक्षेसंबधातील समस्या त्वरित सोडविण्याच्या दृष्टिने आपला यत्न असेल, कारवारला सुपर स्पेशलिटी इस्पितळ त्याच प्रमाणे बेरोजगार युवकांच्या रोजगाराचा प्रश्न सोडविण्यासाठी या ठिकाणी औद्यौगिक प्रकल्प सुरू करण्याकडे आपण प्राधान्य देणार असल्याचे त्यानी यावेळी स्पष्ट केले. आपल्या विजयासाठी महत्वाची भुमिका बजावलेले आनंद असनोटीकर, काँग्रेस समितीचे पदाधिकारी यांच्या विषयी त्यांनी गौरवोद्गार काढले. श्री. सैल यांच्या यशा बद्दल काणकोण मतदारसंघातील त्यांचे चाहते, नातेवाईक यांनीही यावेळी प्रत्यक्ष त्यांची सदाशिवगड येथील त्यांच्या निवास स्थानी जाऊन त्यांचे अभिष्ट चिंतन केले. काँग्रेसचे नेते जनार्दन भंडारी हल्याळा मतदारसंघातून विजयी झालेले आर. व्ही. देशपांडे आणि कारवार मतदारसंघातून विजयी झालेल्या सतीश सैल यांची प्रत्यक्ष भेट घेऊन त्याना शुभेच्छा दिल्या.