राजू सेठ यांच्या प्रचारासाठी सतीश जारकीहोळी यांची धाव

बेळगाव : उत्तर मतदारसंघातील काँग्रेसचे अधिकृत उमेदवार राजू सेठ यांच्या प्रचारासाठी दिग्गज नेत्यांच्या सभा झाल्या. त्याचप्रमाणे स्थानिक नेत्यांनीही प्रचारासाठी धाव घेऊन राजू सेठ यांना विजयी करण्याचे आवाहन केले आहे. आता कर्नाटक राज्य काँग्रेस कार्यकारिणीचे कार्याध्यक्ष सतीश जारकीहोळी प्रचाराच्या रिंगणात उतरले आहेत. रविवारी आझमनगर येथे आयोजित प्रचारसभेवेळी राजू सेठ यांना मतदान करण्याचे आवाहन केले. राजू सेठ यांचा प्रचार शिगेला पोहोचला असून प्रत्येक भागात मतदारांपर्यंत पोहोचण्याचा प्रयत्न केला आहे. ठिकठिकाणी सभा, प्रचारफेऱ्या आयोजित करून निवडून देण्याचे आवाहन केले आहे. महाराष्ट्राचे माजी मुख्यमंत्री पृथ्वीराज चव्हाण यांच्यासह दिग्गज नेतेमंडळींनी बेळगावात धाव घेऊन प्रचारफेरी आणि प्रचारसभेत सहभाग घेतला. त्याचप्रमाणे आझमनगर येथे आयोजित केलेल्या सभेवेळी सतीश जारकीहोळी उपस्थित होते. शहरात प्रचारासाठी सतीश जारकीहोळी रिंगणात उतरले आहेत. राजू सेठ यांच्या पाठीशी राहून त्यांना निवडून देण्याचे आवाहन केले. काँग्रेसने आपला अजेंडा यापूर्वीच प्रसिद्ध केला असून बेरोजगारांना भत्ता, महिलांना मोफत बसप्रवास आरोग्य सुविधा अशा विविध योजना उपलब्ध करून देण्यात येणार आहेत. त्यामुळे काँग्रेस उमेदवारांना निवडून देण्याचे आवाहन सतीश जारकीहोळी यांनी केले.