दहिवडी/प्रतिनिधी
माणचे तहसिलदार यांचे तडकाफडकी निलंबन झालेमुळे सातारा महसूल विभागात प्रचंड खळबळ माजली आहे. माण खटाव भागात मोठ्या प्रमाणात बेकायदा वाळू उपसाबाबत आधीच पाच तलाठ्यांचे निलंबन झाले आहे. आता यापाठोपाठ माण तालुक्याचे तहसीलदार येवले याचे निलंबन झाल्याने माण तालुक्यात एकच खळबळ उडाली आहे. वारंवार सातारा जिल्हाधिकारी यांच्याकडे माण नदीवरील वाळू उपसाबद्दल तक्रारी येत होत्या. मात्र आमच्या भागात कोणतीही बेकायदा वाळू वाहतूक होत नसल्याचे माणच्या महसूल विभागाकडून सांगितले जात होते.
दरम्यान, एका कारवाई वेळचा व्हिडिओ आणि ऑडिओ क्लिप सातारा जिल्हाधिकाऱ्यांच्या हातात आली, यावरून जिल्हाधिकाऱ्यांनी पाच तलाठ्यांचे निलंबन केले होते. आता त्याच प्रकरणात माणचे तहसीलदार येवले यांचेही निलंबन झाल्याने महसूल विभागासोबत जिल्ह्यात चर्चांना ऊत आला आहे. याआधी प्रातांधिकारी आणि तहसीलदार येवले या दोघांनाही कारणे दाखवा नोटिस बजावण्यात आली होती. त्यानंतर थेट निलंबन झाल्याने महसूल विभागामधूनच आश्चर्य व्यक्त केले जात आहे.
