कागवाड पोलिसांची कारवाई : तब्बल 36 मोटारींसह 9 लाखांचा मुद्देमाल जप्त
बेळगाव : कागवाड, शेडबाळ, शिरगुप्पी, मोळे परिसरातील विहिरी व नदी किनाऱ्यावर बसविलेल्या विद्युत मोटर चोरणाऱ्या सांगली येथील त्रिकुटाला कागवाड पोलिसांनी अटक केली. त्यांच्याजवळून सुमारे 9 लाख रुपये किमतीचा ऐवज जप्त करण्यात आला आहे. जिल्हा पोलीसप्रमुख डॉ. संजीव पाटील यांनी ही माहिती दिली. योगेश ऊर्फ मल्लाप्पा ईश्वर करोली ऊर्फ पाटील (वय 33, मूळचा रा. अनंतपूर, सध्या रा. सांगली), सतीश विठ्ठल सूर्यवंशी (वय 45, रा. कोल्हापूर रोड, सांगली), विजय ईश्वर भिसे (वय 32, रा. हरिपूर रोड, सांगली) अशी अटक करण्यात आलेल्यांची नावे आहेत. त्यांच्या जवळून 7 लाख रुपये किमतीच्या 36 विद्युत मोटर जप्त करण्यात आल्या आहेत. अथणीचे पोलीस उपअधीक्षक श्रीपाद जलदे, पोलीस निरीक्षक रविंद्र नायकोडी, कागवाडचे पोलीस उपनिरीक्षक एच. के. नरळे, एस. आर. नायकोडी व त्यांच्या सहकाऱ्यांनी ही कारवाई केली. आंतरराज्य गुन्हेगारांना अटक करून त्यांच्याजवळून मोठ्या प्रमाणात चोरीचा ऐवज जप्त करणाऱ्या पोलीस पथकाचे जिल्हा पोलीसप्रमुखांनी कौतुक केले आहे. सोमवार दि. 20 फेब्रुवारी रोजी ही कारवाई करण्यात आली. चोरीसाठी वापरलेले 1 लाख 97 हजार रुपये किमतीची दुचाकी व गुड्स वाहन असा 8 लाख 97 हजार रुपये किमतीचा ऐवज पोलिसांनी जप्त केला आहे. शेतकऱ्यांनी पिकांना पाणी पाजविण्यासाठी आपल्या विहिरींवर नदीकाठावर बसविलेल्या मोटर चोरण्यात येत होत्या. गेल्या एक वर्षांपासून सीमाभागात विद्युत मोटर चोरण्याचे प्रकार सुरू होते. जिल्हा पोलीसप्रमुख डॉ. संजीव पाटील, अतिरिक्त जिल्हा पोलीसप्रमुख एम. वेणुगोपाल यांच्या मार्गदर्शनानुसार अथणी व कागवाड पोलिसांनी सांगली येथील त्रिकुटाला अटक केली आहे. गेल्या सहा महिन्यांत या त्रिकुटाचा उपद्रव वाढला होता.
